Police 8 in hri kai belh leh

Zonuna Kawlni (LENKAWL) • November 20, 2020 • Comments • Serchhip

Niminpiah khan Serchhip District-ah COVID-19 hri kai mi 8 hmuhchhuah leh an ni a, an vai hian Mizoram Police mi leh sa, tunhnaia Bihar inthlanna a Duty te an ni.

Thudawn danin niminpiah khan Serchhip District-a TrueNat Laboratory-ah Sample 36 enfiah niin heng atang hian COVID-19 hri kai mi 8 te hi hmuhchhuah an ni a, an vai hian mipa vek niin kum 31 leh 59 inkar an ni a, Mizoram Police mi leh sa, tunhnaia Bihar Assembly inthlanna a Duty a kal, tun thla ni 11-a Serchhip District rawn thleng leh PTS Then-zawl-a khunghran lai an ni a, an taksa a hri kai lanchhuahna neilo vek an ni.

Heti hian tunhnaia Bihar inthlanpui a Duty, Serchhip District-a rawn haw mi 57 zingah COVID-19 hri kai hmuhchhuah chu mi 20 an tling ta a, tunah hian anmahni inkhunghranna hmunah hian mi 37 an la awm mek bawk a ni.

Nimin thleng khan Serchhip District-ah COVID-19 hri kai hmuhchhuah chu 110 an tling ta a, an zinga mi 87 te chu enkawl dam ni tawhin tunah hian hri kai 23 chu enkawl mek an ni.