Order hnuklet turin CM ngen

Mizo Zirlai Pawl (MZP) General Hqrs. chuan tunhnaia diklo taka MES Appointment Order siam chu sut leh turin Mizoram sawrkar an ngen.

Nimin a thuchhuah an siamah MZP chuan Mi-zoram sawrkar in tunhnaia Bamboo Development Agency-a Assistant Engineer-a thawk mek chu Junior Grade of Mizoram Engineer Service (PWD Cadre)-ah absorb anih theih nana MES Rules, 2013 rule 34 hmanga One-Time Relaxation of rule 22(6)(a)(1) of MES Rules 2013 order a tichhuak chu pawi an tih thu leh hriatthiam har an tih thu an sawi a. Uchuak taka induhsakna leh thalai hna zawng mekte tana thil pawi tak a nih avangin rang taka he order hi sut leh nghal turin Mizoram sawrkar an ngen a ni.

MZP thuchhuah chuan thalai lehkha-thiam leh hna thiam tam tak an awm laia mimal induhsakna uchuak tak avanga rem leh remlo a hnaa inthun tumna awm thin chu an haw hle tih sawiin, hun hmasa lamah pawh hetiang thiltih tenawm tak hi MZP chuan alo dodal tawh thin tih an sawi a. Sawrkar leh Department-in a mamawh vang leh thiamna bik neite chu hriatthiamna zau tak an lo neih tawh thin thu leh MPSC-in dan dik taka MES tur mi sawm pasarih (17) zet a lak tawh pawh tun thlengin Appointment pek an la nih loh laia, mi bik leh mamawh vang pawh ni lo, induhsakna avang chauha hetiang hna sang leh pawimawh Appointment Order pek a ni ta chu MPSC rinlohna lian tak a nih bakah zirlaite leh thalai hna zawng mekte tan rilru hnualna a thlen mek nia an hriat thu an sawi a ni.

MZP hian Mizo thalaite hmakhua ngaia Order hi hnuklet nghal turin nimin khan Chief Minister hnehah ngenna an thehlut a, Mizo thalaite leh hnazawng mekte bakah, MES zahawmna humhim a nih theih nan a hlawhtlin ngei an bei-sei thu leh Order hi hnuhlet a nih loh chuan a tul anga hma an lak zel dawn thu an sawi bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn