2nd National Water Award-a Mizoram in ‘Best State Award’ a dawn lawmna Minister hovin neih a ni

Ministry of Jal Shakti in a buatsaih, 2nd National Water Award-a Mizoram in ‘Best State Award’ a lak lawmna chu nimin khan Irrigation and Water Resources Minister, C. Lalrinsanga hovin a pisa-ah neih a ni.

Nimin-a he Award lawmna ah hian Irrigation and Water Resources Minister, C. Lalrinsanga chuan Best State lawmman Mizoram in a la chu Pathian malsawmna a ni tih sawiin, Chief Minister in Irrigation and Water Resources Department hmalakna te a phurpuiin a tuipui thin a, chu chuan phurna leh chona nasa tak a pek thin thu leh, thawhhona tha tak hnuaiah Department lama an hotute leh thawktute inpekna a thuk em em bawk a ni, a ti a. Zoram mipuite, a bikin loneituten sawrkar hmalakna an thlawp tha em em bawk a, hengte avanga he dinhmun hi thlengthei kan ni, a ti.

He Best State Award hi Department mal bik nilovin Zoram mipui zawng zawngte lawmman lak a ni tih Minister chuan sawiin, Irrigation and Water Resources Department kaltlangin Mizoram sawrkar chuan Irrigation Scheme hrang hrang kalpuiin, National Hydrology Project-ah phei chuan Small States Category-ah a titha Top 3-ah Mizoram chu a lang a; Mizoram State Water Policy pawh February ni 27, 2020 khan Mizoram chuan kan nei tawh bawk a. Water Conservation leh Water Table neih that kawngah te, Irrigation Schemes hrang hrang kalpui danah te Mizoram chu India rama a ti tha ber pawl-ah kan la lang thei zel a ni, a ti.

Hei bakah hian Minister chuan State Water Policy hnuaiah Water Resources Regulatory Authority in kalphung awmze nei a neih theihnan Mizoram hmun hrang hrang 28 ah ruahtui tlakdan data lak a nih dawn thu leh hmun 16-ah Sensor dah a ni bawk ang tih a sawi a, Tui volume leh tui luan chak dan, Fur leh Thal inkara tui awmdan, bakah Spring Source atanga a luan darh dan te, ruah sur atanga lei hnuaia tui in recharge dante zirchian a ni ang a; heng data collect atangin regulatory actions duan a ni ang, a ti bawk.

National Water Award hi kum 2018 atang khan buatsaih tan niin a vawihnihna, 2nd National Water Award 2019 chu November ni 11-12, 2020 chhung khan sem a ni a. Hetah hian Category hrang hrang 16 siam niin Best State (Special Category)-ah Mizoram chu lawmman Pakhatna hlan a ni a. He lawmman la tur hian tehfung hrang hrang hmanga State hrang hrang teh an ni a. Water Conservation leh a kaihhnawih subject hrang hrangah te, Regulation lama hmalaknate, PMKSY leh Irrigation Scheme hrang hrang kalpui danah te teh fung duan a ni a. Mizoram chu Best State (Special Category) ah a titha bera puan a ni.