Mizoram-ah COVID-19 hri kai mi 3 hmuh belh an ni

Pathianni khan Mizoram-ah Sample 835 enfiah niin COVID-19 hri kai mi 3 hmuhchhuah an ni.

Niminpiah-a Mizoram-a COVID-19 hri kai hmuhchhuah mi pathum zinga pahnih hi Saitual District-a hri kai hmuhchhuah niin Bihar atanga lo kal, NHIDCL hnuaia hnathawk tur niin anmahni hmun-a inkhunghrang mek an ni a, midang pakhat hi Mamit District chhung Kanhmun khua mi niin Assam Regiment mi leh sa, chawlh hmang tura rawn haw a ni thung. Pathianni khan ZMC Laboratory chu khar niin Sample enfiah a awm lova, Saitual-a TrueNat Laboratory-ah Sample 11 enfiah niin District hrang hrangah Rapid Antigen Test hmangin Sample 824 enfiah a ni bawk.

Mizoram-ah COVID-19 hri kai thih belh leh :

State Referral Hospital, Falkawn-a COVID-19 hri kai enkawllai pakhat chu nimin khan boral lehin Mizoram-ah he hri kai nunna chan chu mi 5 an tling ta. Sawrkar thuchhuah in a tarlan danin Rengchhuana (79), Seling hi SRHF-ZMC ah hun engemawchen enkawl a nih hnuin nimin chawhnu dar 2:40 khan a boral a, heti hian Mizoram-ah COVID-19 avanga nunna chan mi panga (5) an awm ta a ni.

Thudawn danin Rengchhuana chhungte zingah hian amah bakah a nupui, a fanu leh a tu te pahnih chu Covid-19 hri an kai vangin enkawl an ni a, a tu te pahnih hi chu enkawl dam ni tawhin a nupui leh a fanu te hi tunah hian enkawl mek an la ni a. A ruang hi Seling-ah lain vui a ni ang.

Nimin khan Mizoram-ah COVID-19 hri kai mi 5 te chu enkawl dam leh niin tun thlengin Mizoram-ah COVID-19 hri kai hmuh chu 3396 an tling ta a, an zinga mi 2881 te chu enkawl dam ni tawhin tunah hian hri kai enkawllai mi 510 an awm mek a, hri kai zingah nunna chan mi 5 an awm tawh bawk a ni.

India ramah hri kai enkawl dam an pung zel :

Darkar 24 kalta chhungin India ramah COVID-19 hri kai 30,548 hmuhchhuah niin mi 43,851 enkawl dam an ni. Ministry of Health & Family Welfare chhinchhiahna atanga a lan danin darkar 24 kalta chhung khan India ramah Sample 8,61,706 enfiah niin hri kai 30,548 hmuh an ni a, heng te nen hian tun thlengin India ramah sample 12,56,98,525 enfiah ni tawhin hri kai hmuhchhuah 88,45,127 an tling tawh a, Sample enfiah atanga zaa 7.03 te chuan hri an kai a ni.

Hetihlai hian darkar 24 kalta chhung khan India ramah hri kai mi 43,851 te chu enkawl dam niin tun thlengin mi 82,49,579  enkawl dam niin hri kai zaa 93.27 te chu enkawl dam an ni tawh a, tunah hian hri kai enkawllai 4,65,478 awmin hri kai zingah nunna chan 1,30,070 an awm tawh bawk a ni.