Kolasib-ah PAHOSS kalpui turin ruahmanna siam a ni

Kolasib District Parking House Committee chu nimin khan a vawikhatna atan thukhawm in Kolasib khawchhung-a motor 300 inhun theihna turin Parking House Support Scheme kalpui dan tur an rel.

Kolasib DC Conference Hall-a he thutkhawm hi bialtu MLA leh Supply Minister, K. Lalrinliana chuan hmanpuiin Kolasib khua than zelna kawnga harsatna a awm loh nan Motor hunna tur mumal tak a kalpui a tul thu a sawi a, Traffic tawt avanga harsatna a awm lohna tura lo inhmakhua lawk a pawimawh thu sawiin, UD&PA hnuaia PAHOSS chu tangkai taka chhawr a nih theih nan Parking House sakna tur a tanpuina dawng thei tur thlanchhuahna chu uluk tak a kalpui turin Parking House Committee chu a chah a ni.

He Meeting hian Kolasib-a Parking House Support Scheme (PAHOSS) dilna thehluh hun chu November ni 16, 2020 atanga January ni 15, 2021 thleng ni turin an ruat a, dilna luh dan a zirin a hmunhma endik tur a ruat ten endik hna an kalpui nghal zel dawn a ni. Dil turte chuan lirthei ke li (4) nei 5 emaw, lirthei ke hnih nei 30 tal hun theihna hmun an nei tur a ni a, lirthei hun nan kum 10 tal hman tur a ni dawn a ni. PAHOSS hnuaiah hian lirthei ke li nei pakhat emaw, ke hnih nei 6 hun theihna hmun sak nan cheng nuai 1 zel tanpuina pek a ni ang a, lirthei hun man (Parking fee) hi a In neituten an chang vek dawn bawk a ni.