Thingsulthliah PHC tan MLA in Ambulance hlan

P&E Minister, R. Lalzirliana chuan Inrinni khan a bial chhung, Thingsulthliah PHC-a damlo mamawhtute hman atan Maruti Suzuki siam ECCO Ambulance thar a hlan.

MLA Fund atanga lei Ambulance thar hlanna puala inkhawm tawi neih ah P&E Minister chuan kumin-ah hripui a leng avangin MLA Fund chu tumdang leh kumdang anga mipui mamawh ngaihtuah chunga inhlawhna siam nan te, khaw bil mamawh leh cheibawl nana hman a inthlahrunawm tih sawiin, Hripuiin khawvel pum a nuai avangin sum awm ang angte chu hripui dona kawngah a tul apiang lei nan te hman tangkai a that avangin chumi ngaihtuahna nei chung chuan Thingsulthliah PHC mamawh Ambulance thar chu MLA Fund atangin a lei tih a sawi a. Hei hi bial mipuiten an hriatthiam a duh thu a sawi bawk.

Tawi  bialtu MLA chuan a bial chhunga Thingsulthliah chu Aizawl District chhung anih avangin SIRD hmun leh JNV School te chu Aizawl District-a Covid veite enkawl nan loh theih loh avangin hman a tul thu sawiin, mipuite chi-ai lo turin a chah a. Saitual Jail hmun pawh Covid veite enkawl nan hman a rem riaua a hriat thu a sawi a. Hmarchhak mai ni lo India ram pumah Covid avanga boral awm lohna state awmchhun kan ni chu Pathian min venna leh mipuite bang lova an tawngtaina rah a nih ngei a rin thu sawiin, Kohhran hruaitute leh mipuite chu tawngtai zel turin a chah bawk a ni.

Ambulance thar hi cheng nuai 6 man bawr niin Thingsulthliah PHC Medical Officer, Dr. Vanzarliani hnenah a  hlan a, Partial Lockdown avangin a Registration tihfel la ni lo thung a, amaherawh chu mipui mamawhna a san tawh avangin an inhlan a ni. Tawi bialtu MLA hian MLA Fund atangin Covid-19 do nan cheng nuai 50 a lo thawh tawh bawk a, Thingsulthliah PHC tan hian Generator pawh kumin ah bawk hian a pe tawh bawk a ni.