NFSA hnuaiah mi nuai 6 chuangin hamthatna dawng

National Food Security Act-2013 hnuaiah Mizoram chhungah mi 6,89,439 ten hamthatna an dawng mek.

National Food Security Day-2020 puala Food, Civil Supplies & Consumer Affairs Department in thuchhuah an siamah National Food Security Act-2013 hi India rampum a hman theih turin September 10, 2013 khan pawm niin India President-in Sept. 12, 2013 khan a hming a ziah hnan leh a, he ni hi Central Sawrkar chuan 'National Food Security Day' ah pawmin kumin (2020) hi he ni hman a nih hmasak berna ni a ni a. National Food Security Act, 2013 hi Mizoram-ah March ni 1, 2016 khan hman tan a ni.

NFSA, 2013 hnuaia hamthatna dawng thei tur zat hi Central Sawrkarin Census-2011 Population tlawhchhanin Mizoram-ah mihring 7,06,296 thlan phal sakin AAY bik dawng thei tur hian chhungkaw 26,100 phalsak a ni bawk a, hei hi Mizoram mipui atanga 64.73% a ni a, Veng/Khua malah Census-2011 population base-in Thingtlang (Rural)-ah 81.88% leh khawpui (Urban)-ah 48.60% thlan theih an ni bawk.

Mizoram-ah hian kumin August 31 thleng khan National Food Security Act-2013 hnuaiah Priority Households (PHH)-ah beneficiary mihring 613,481 leh Antyodaya Anna Yojana (AAY)-ah mihring 75,958 awm mekin an vaiin mihring 6,89,439-in he hamthatna hi an dawng mek a. AAY (Card Eng) nei chhungkua te hian thla tin buhfai kg. 35 chu Kg. khat zelah Rs. 3/- hisapin an lei thei a, PHH (Card Hring) nei te chuan thla tin mi pakhat tan kg. 5 zel chu kg. ah Rs. 3/- hisap-a an lei theih bakah thla tin mi pakhat tan Kg. 3 zel chu State sawrkar atangin Kg. ah Rs. 15/- hisap in an lei thei bawk a. Hei bakah hian Non-NFSA (Card Var) nei te chuan thla tin mi pakhat tan buhfai kg. 8 chu kg. ah Rs. 15/- hisap in an lei thei bawk a ni.

Hei bakah hian sawrkar laipui ruahmanna angin 'One Nation One Ration Card' chu kalpui chhoh mek a ni bawk a, Central Sawrkar in National Portability Scheme a kalpui mekah India ram chhunga NFSA beneficiary (Ration Card Eng leh Hring nei) ten khawi hmun leh khawi State atang pawha an Ration Quota, Ration Card hmanga an lak theih dan tur ruahmanna siamin hei hi 'One Nation One Ration Card' tiin a vuah a. Hemi tihlawhtling tur hian Mizoram Sawrkar pawhin theihtawp chhuahin hma a la mek a, he Scheme tihlawhtling tura pawimawh ber chu Ration Card leh Aadhaar No. thlunzawm(link) a ni a, hei hi chak taka kalpui a nih mek lai hian tunlai hrileng (Covid-19) avang hian duh angin hna a kal chak thei lova, he hna hi zawhfel a nih hunah chuan duhna hmun hmun atangin (Internet connection a that phawt chuan) kan ration kan la thei tawh dawn a ni.