Mizoram-ah hri kai la hmuhchhuah belh zel a ni

Zirtawpni-a Mizoram-a Sample enfiah atangin COVID-19 hri kai 26 hmuh an ni a, Inrinni-a Sample enfiah atangin hri kai 35 hmuhchhuah ni bawkin ni hnih chhungin hri kai 61 zet hmuhchhuah an ni.

Sawrkar thuchhuah in a tarlan danin Zirtawpni khan hri kai hmuhchhuah 26 zinga 18 te chu ZMC Laboratory atanga hri kai tih hmuhchhuah niin heng mite hi Aizawl Venghnuai mi, hri kai hmuhchhuah tawh te nen inkawmhnaih atanga hri hi kai an ni a, mipa 15 leh hmeichhia 3 niin an vai hian In lama inkhunghrang mek an ni a, an zingah hian nausen thla 9 mi a tel bawk. Aizawl Venghnuai-a hri kai hmuhchhuah zinga 14 te hi Local Task Force Member te an ni bawk. Hri kai hmuhchhuah dan mi 8 te hi TrueNat Laboratory atanga hri kai hmuhchhuah te an ni a, Siaha District-ah hri kai pakhat hmuhchhuah niin Lawngtlai Distreict-ah mi 2 leh Saitual District-ah mi 5 hmuhchhuah an ni a, heng mi 8 te hi State pawn mi leh khunghran lai vek an ni bawk.

Hetihlai hian Inrinni-a sample enfiah atangin hri kai 35 hmuh leh an ni bawk a, heng te hi ZMC Laboratory atangin mi 28 bakah TrueNat Laboratory atangin mi 5 leh Rapid Antigen Test hmangin mi pahnih te an ni. ZMC Laboratory atanga hri kai hmuhchhuah zinga mi 12 te chu hri kai te nen lo inkawmhnaih atanga hri kai Aizawl Veng hrang hrang mi an ni a, midang 16 te chu State dang atanga rawn lut, Quarantine Centre-a awmlai an ni. Heng bakah hian TrueNat khawl hmangin Lunglei District-ah hri kai 4 hmuh niin Kolasib District-ah pakhat hmuh a ni a, Rapid Antigen Test hmangin Kolasib District-ah hnamdang driver mi 2 te chu hri an kai tih hmuhchhuah a ni bawk.

Mizoram-a hri kai hmuhchhuah tawh atangin Inrinni khan mi 33 leh nimin khan mi 7 te chu enkawl dam niin anmahni enkawlna hmun atanga chhuahtir an ni bawk a, heti hian nimin thleng khan Mizoram-a hri kai hmuhchhuah chu 1414 ni tawhin mi 830 te chu enkawl dam an ni tawh a, tunah hian hri kai enkawllai 584 awmin hri kai hmuhchhuah atanga zaa 58.69 te chu enkawl dam an ni tawh a ni.

India-ah COVID-19 hri kai nuai 47 an tling tawh

India rama COVID-19 hri kai hmuhchhuah chu nuai 47 an tling tawh. Ministry of Health & Family Welfare chhinchhiahna atanga a lan danin darkar 24 kalta chhung khan India ramah hri kai 94,372 hmuh leh niin heng te nen hian hri kai hmuhchhuah chu 47,54,356 an tling tawh a, India rama sample enfiah 5,62,60,928 atangin hri kai hi 8.45% a tling a ni. India rama hri kai zingah mi 37,02,595 chu enkawl dam ni tawhin hei hi zaa 77.87 a ni a, hri kai enkawllai 9,73,175 awmin hri kai zingah nunna chan 78,586 an awm tawh bawk a ni.