National Food Security Day-2020 lawmna Serchhip-ah Bawrhsap hova neih a ni

National Food Security Day-2020 lawmna chu Inrinni khan Serchhip-ah neih a ni a, he hun hi Serchhip District Bawrhsap, Kumar Abhishek IAS chuan khuallian niin a hmanpui a ni.

Serchhip DC Conference Hall-a National Food Security Day-2020 lawmna ah hian District Bawrhsap chuan India khua leh tui tumah chhuanchham leh riltam-a an awm lohna tura hmalakna dan pawimawh, Food Security Act kan nei chu kan vanneih hle tih sawiin, Naupiang hlim atanga kan damchhung zawng eitur tlakchham hlauhthawn awm loha min nun tir chu he Dan in a tum ber a ni tih a sawi a. Tunhnaia sawrkar laipui hmalakna thar, ‘One Nation One Ration Card System’ chungchang pawh sawiin, he ruahmanna hi mitin mamawh a nih thu leh, India khua leh tui tu pawh, kan State a hnathawka rawn awm State pawn mite tan a tangkai dawn hle a, chutiang bawkin kan State mi leh sa, State pawna awm te pawhin an hmang tangkai thei dawn tih a sawi a. He hmalakna hi kan District-ah tha taka a hlawhtlin theih nan theihtawp kan chhuah tlan a pawimawh thu a sawi a. Adhaar leh Ration Card thlunzawm kal mek pawh zaa za hlawhtling thei tura kan beih a tul thu pawh sawiin, Serchhip District Adhaar Enrolment Centre-a thawktu dah belh a nih tur thu a sawi bawk.

He hun kaihruaitu Serchhip District Civil Supply Officer, C. Zadailova chuan Serchhip chu Aizawl tih lohva Digital Weighbridge nei awmchhun a nih thu sawiin, Consumer Union, VC leh tlawmngai pawl hrang hrang te nena inhnaih leh inpawh taka hna an thawh thin thu a sawi bakah thawhhona tha tak nei zel turin a sawm a. Serchhip-a Supply Kudam awm mek chu tihlen tuma hmalak mek a nih thu a sawi bawk.

Serchhip-a National Food Security Day-2020 lawmna ah hian Supply Inspector, J. Zomuansanga chuan National Food Security Act (NFSA), 2013 leh Targetted Pubic Distribution System (TPDS) kalpui mek dan te leh One Nation One Ration Card System kalpui mek dan a lem nen chipchiar takin a sawifiah a. Adhaar thlunzawm hnathawh mekah Serchhip District-ah za zela 30 vel zawh a nih tawh thu te, One Nation One Ration Card kalpui bultan nan Internet Signal nei thaa an ngaih Fair Price Shop (FPS) pasarih (7) chu a thawhkhat nana thuneitu sang zawka thehluh a nih tawh thute a tarlang bawk. Ani bakah hian Serchhip District Consumers Association (SDCA) atangin an Secretary, Laldinpuia leh Serchhip VC Association aiawhin Serchhip-VIII VCP, C. Vanlalsiamthara te pawhin thu an sawi bawk.

Serchhip-a National Food Security Day hmanna ah hian Serchhip Addl. DC, Lalmuansanga Ralte leh SDO (Sadar), C. Lalduhzuali te bakah Serchhip-a tlawmngai pawl hrang hrang aiawhte, NGO Coordination hruaitute, VC te, Consumer's Union hruaitute, thuthar thehdarhtute leh Food, Civil Supplies & Consumers' Affairs thawk bakah khawpui chhunga Retailer te an tel a ni.

Comments

Chhiar Hlawhte