AYUSH Doctor za chuang duty

Mizoram AYUSH Doctors' Association (MADA) chuan Mizoram hmun hrang hrangah AYUSH Doctor za chuang COVID-19 Facility hrang hrangah mawhphurhna lain an duty mek niin an sawi.

Nimin a thuchhuah an siamah MADA chuan khawvel hmundang ruala Mizoram in CO-VID-19 vanga harsatna nasa tak a tawh lai leh hriselna lam hnathawktute tan pawha hri kai hlauhthawnawm tak a nih laia, mipui tana mahni inhlan leh sawrkar thupek apiang awiha mawh-phurhna zo taka hlenchhuak thin an member zawng zawngte chungah lawmthu an sawi a ni.

MADA thuchhuah tarlan danin tunah hian COVID Care Centre (CCC)-ah AYUSH Doctor mi 39, Dedicated COVID Health Centre (DCHC)-ah mi 3, Quarantine Facility Monitoring Team-ah mi 37, Sample Collection Team-ah mi 11, Screening Point-ah mi 5 leh AYUSH Prophylaxis Distribution Team-ah mi 12 an duty mek tih an sawi a. Heng bakah hian State leh District hrang hranga Surveillance Team of Containment, Contact Tracing Team, Logistic Team, Infection Control Team etc. ah an tel bawk tih sawiin, tunah hian an member mi 40 chuang chu COVID-19 do tura sawrkar leh ramin a mamawh huna koh mai theih tura in volunteer an awm mek tih an sawi bawk.