Hydel Project bakah Gas leh Solar hmanga kawlphetha siam turin tanlak tum a ni - Chief Minister

Chief Minister, Zoramthanga chuan kawlphetha-a intodelh turin Hydel Project piah lamah Gas leh Solar hmanga kawlphetha siam tura tanlak tum a ni tih nimin khan Assembly House a hrilh a. P&E Minister, R. Lalzirliana chuan tuna Mizoramin kawlphetha a siamchhuah chu chawhrualin Megawatt 36 vel a ni tih House a hrilh bawk. 

Nimin a Mizoram Legislative Assembly thutkhawm zawhna leh chhanna hunah ZPM Member, Vanlalhlana leh member dangten kawlphetha chungchang an zawhna P&E Minister, R. Lalzirliana'n a chhanna a sawifiahnaa House Leader, Zoramthanga hian Power Supply chu a pawimawh tih sawiin, tuna Mizoram mamawh tam zawk hi phai lam atanga lei a nih avangin mahni-a siam chhuah ve a ngai a ni, a ti a. Hydel Project kalpui tur chuan tui khuah a ngai a, hei hi a hautak a, Forest Clearance ringawt pawh nei tura beih fe a ngai a, a ram tihchhiat tur atan zangnadawmna tam tak pek a ngai thin bawk a. Hetiang hi thil awm dan a nih avangin Gas leh Solar hmanga kawlphetha siam chhuak tura tan lak tum a ni tih a sawi.

P&E Minister, R. Lalzirliana chuan ZPM member, Vanlalhlana zawhna chhangin tuna Mizoram-in kawlphetha a siamchhuah chu chawhrualin Megawatt 36 vel a ni tih sawiin, Mizoram chu kawlphethaa-ah a intodelh thei a, intodelh turin Hydro Electrict Project engemaw zat siam a ni tawh a, tunah hian siam mek leh siam tur hmachhawp a awm bawk tih a sawi bawk a. Hydro Electrict Project hian ram a tihchhiat nasat avangin a tha tawk lo tih ngaihtuahna a awm a, hetihrual hian thildang atanga kawlphetha siamchhuak turin tihngaihna a la awm rih loh avangin Hydro Electric Project chu a theih ang anga siam tum a ni, a ti.

Ni zung chakna hmanga kawlphetha siam tum a ni tih pawh sawiin P&E Minister, R. Lalzirliana chuan, Vankal-ah Megawatt 20 pe-chhuak thei tur leh Tlungvel-ah Megawatt 2 pechhuak thei tur buaipui mek a ni a. Hemi bakah hian hmun dangah Megawatt 10 pechhuak thei tur siam tum a ni a, Tender pawh koh mek a ni tih a sawi bawk.

P&E Minister chuan, phailam atanga kawl-phetha leina man pek tlai vanga sum chawibelh awm thin chu tuna MNF kaihhruai Sawrkar pian hnuah sum pek dan tih danglam a nih avangin sum chawi thlawn hi a awm tawh lo tih a sawi a, Mizoram in kawlphetha a mamawh san lai berin MW 120 vel a mamawh thu a sawi bawk.