Assam Rifles DG-in Chief Secretary a kawm

Mizoram-a Assam Rifles hotu ber Director General, Lt. General Sukhdeep Sangwan chuan nimin khan Chief Secretary, Lalnunmawia Chuaungo chu a Pisa-ah a kawm.

Assam Rifles-te hian Aizawl khawpui an chhuahsan theihna turin kum 1987 daih tawh khan Zokhawsang-ah hmun pek an ni a. Mizoram sawrkar chuan an mamawh Tui, Electricity leh kawng te pawh a siam zo vek tawh a. An building hrang hrang sa tura Ministry of Home Affairs in a ruat contractor chuan an hna pawh an zo thawkhat tawh a. Chuvangin Assam Rifles te chu a rang thei ang bera Zokhawsang-a insawnchhuah dan ngaihtuah turin Chief Secretary hian a hriattir a ni.

Ram thenawm Myanmar nena Mizoram inrina a ruka paltlangin drugs leh silai tawlhruk a awm fo thin tih pawh he hunah hian sawilan niin ramri venna kawngah Assam Rifles chuan hna tha zawka an thawh theih nan State sawrkar nen tha taka an thawhho a tul thu Chief Secretary chuan a hrilh a, Mizoram chhung kawngpui (highway) hmun thenkhata phalna nei lova Assam Rifles-in check gate an siam te pawh thiat vek turin a hrilh a, ramri luhka (entry/exit) hmunah te chauh heng check gate te hi an siam thei tih a hrilh bawk. Hei bakah hian tunhnai a Assam Rifles chet dan in State sawrkar leh mipui rilru a tih nat thu pawh Chief Secretary chuan sawiin, Assam Rifles ten thupha chawi tura a ngaih thu a hrilh bawk.

Comments

Chhiar Hlawhte