Chief Secretary hovin State Level Screening Committee on BADP thutkhawm neih a ni

State Level Screening Committee on BADP chu nimin khan Chief Secretary, Lalnunmawia Chuaungo hova thukhawmin BADP hnuaia hmalak dan tur hrang hrang an sawiho.

Video Conferencing kaltlanga he thutkhawm ah hian Rural Development Department Director, Florence Zotluangpuii chuan Ministry of Home Affairs in kum 2019-2020 chhung khan Border Area Development Programme (BADP)-ah Mizoram tan cheng nuai 3096 a ruahman tih sawiin, Mizoram Sawrkar doletna (State Matching Share) cheng nuai 344 dah a ni bawk a. March ni 25, 2020 khan vanneihthlak takin sawrkar laipui hian cheng vbc. 24.96 a pek belh bawk a. Kum 2019-2020 chhung atan hian sum hmuh tura beisei bakah hmuh belh nen Central Share belhkhawm hi cheng Vbc. 55.926 a awm tih a sawi a. Hetihlai hian a tam zawk K-Deposit-ah a lut tih sawiin, cheng nuai 606.19 release tawh niin a bak zawng hi Mizoram Sawrkar Finance Department-ah release leh tura dil mek a ni tih a sawi bawk.

He Meeting-ah hian Ministry of Home Affairs chuan sawrkar kum 2020-2021 atang March ni 13, 2020 khan BADP-ah State hrang hrang tana sum bithliah a tifel tawh tih tarlan niin Mizoram tan hian Central share Cheng Vbc. 26.086 leh State Share cheng Vbc. 2.896 ruahman a ni a. BADP 2020-2021 chu Deputy Commissioner te kaihhruaina hnuaia din District Level Commitee on BADP leh Block Level Committee ten rawtna an siamte leh Ministry of Home Affairs-in Fund a dah dana zira siamremin Draft Annual Action Plan chhawpchhuah a ni a. RD Block hrang hrang 15 te tan belhkhawmin cheng nuai 2796 dah a ni a. Monitoring, Supervision leh Inrelbawlna atan cheng nuai 28.40 ruahman a ni a. Hriat lawk loh, tul bik thildang a lo awm thulha hman tur cheng nuai 72 ruahmanna siam a ni bawk.

BADP Guideline tharin a phut angin kum 4 chhung atana BADP kalpui dan tur ruahman lawkna, Ministry of Home Affairs-a thehluh chhunzawm tur chu he hunah hian chhawpchhuah a ni bawk a. Hei bakah hian BADP New Guidelines, 2020 behchhanin ramdang nena inrina (International boundary) chu Mizoram Remote Sensing Application Centre (MIRSAC) puihnain Satellite Mapping hmangin ramri an teh a. Satellite mapping hmanga international boundary (imaginary line) atanga km 10 huamchhunga khaw awm zawng zawng chu BADP ah rin luh an ni dawn ta a ni. He imaginary line atanga teh hian BADP hnuaia khaw rin luh thar 69 awmin Serchhip District-ah chuan rinluh thar a awmlo thung a, tunhma BADP a rinluh ni ngailo Reiek RD Block chu rinluh thar zingah telin BADP Guideline thar hnuaiah imaginary boundary atanga KM 10 huamchhungah a tel tak avangin rin luh thar a ni.

Comments

Chhiar Hlawhte