Chief Minister in Assam Rifles hotute a kawm

Chief Minister, Zoramthanga chuan nimin zing khan a chenna, Chief Minister Bungalow-ah Director General Assam Rifles (DGAR) Lt. General Sukhdeep Sangwan chu kawmin, tunhnaia Assam Rifles leh Mizoram inkara thil thleng leh thil pawimawh dang a sawipui.

He an inkawmna ah hian Chief Minister chuan Lt. General Sukhdeep Sangwan hnenah hian Assam Rifles te chu an awmna tura buatsaih, Zokhawsang-ah a rang thei ang bera insuan turin a hrilh a; hrileng avanga Zokhawsang-a hmalakna thenkhat la thawh zawh theihloh awm mahse an insuanchhuah har avangin Smart City Project hmalakna kalpui tur thenkhat a thuanawp phah tih hrilhin, a insubuai lo zawngin a hma thei ang berin a tahtawl-a Zokhawsang a insuan turin a hrilh a ni.

Chief Minister chuan Mizoram chu ramdang pahnih nen inri an nih avangin dan lova ramri pel a lut chhuak an awm thin mai bakah ruihhlo leh thildang tawlhru an awm thin chu a ngaimawh hle tih DGAR hi a hrilh a, heng avang hian Assam Rifles chuan ngawrh leh zawka Mizoram border an venhim a tul tih a sawi a. Chumi atan chuan border hnaih zawka Camp an neih tul a tih thu a sawi bawk. Chief Minister chuan COVID-19 laka mipui an him tlan zawk theih nan Paramilitary Force te vawi khat ah tam tham tak an in transfer thin chu a tul tawpah lo chuan tih rihloh a tul thu leh sawrkar laipui-ah pawh a lo thlen tawh thu DGAR chu hrilh in, ani pawhin an ngaihpawimawh thu a sawi a. Mizoram chu state ralmuang tak a nih avangin Pramilitary Force te chu a chhunga chengte nen pawh inlungrual taka awm ho zel theih tha a tih thu a sawi bawk a ni.

Comments

Chhiar Hlawhte