VC chuh tumte tan hming pekluh hun khar a ni

 Serchhip Town-ah hming pelut 224 an awm

Tun thla ni 27-a Village Council inthlanpui neih tura chuh tumte tana hming pekluh hun chu nimin tlai dar 3:00 khan khar a ni ta a, heng hming pekluh te hi enfiah nghal niin naktuk tlai dar 3:00 thleng inhnukdawk duhte tan hun hawn leh a ni ang.

Village Council inthlanpui neih turah hian Serchhip District chhunga VC 54-ah inthlanna hi neih tura ruahman niin nimin khan Village Council Area hrang hranga Returning Officer te hnenah inthlan chuh tum ten Nomination paper an thehlut fel a, nimin vek khan hming pekluh hi enfiah nghal a ni bawk. Serchhip District chhungah khawi hmun atang mahin thil duhawmlo a thlen thu hriat a ni lova, he thu buatsaih lai hian Nomination File zat hi chiang taka hriat theih la ni lovin Rorellai MNF Party, Congress Party leh ZPM party te chuan he inthlanna hi a hrang theuhin an chuh hlawm a, inhnuhdawh theihna hun a tawp hnu, naktuk tlai dar 3:00-ah Candidate turte hming kimchang zawka hriat theih a ni ang.

Serchhip Town chhunga VC hrang hrang zingah Seat nga awmna Serchhip-I VC-ah Indian National Congress (INC), MNF leh ZPM ten chuh kim vekin Nomination File mi 15 an awm a, Seat 5 bawk awmna Serchhip-II VC-ah party pathum ten Seat chuh kim vekin Nomination File mi 15 an awm a. Serchhip-III VC-ah INC leh MNF ten Seat 5 ve ve chuhin ZPM in Seat 4 chuhin Hmeichhe tana Seat hauh an chuh lo thung a, mi 14 in Nomination Paper an thehlut a ni. Serchhip-IV VC-a Seat 5 awm chu INC leh MNF ten chuh kim vekin ZPM in Seat 2 an chuh a, an vaiin mi 12 in Nomination Paper an thehlut a. Serchhip-V VC a seat 5 awm chu INC, MNF leh ZPM ten chuhin Nomination File mi 15 an awm bawk.

Serchhip-VI VC ah INC leh MNF ten seat awm zawng zawng Seat 5 chuhin ZPM in General-ah Seat khat chuh lovin Candidate 4 an siam a, BJP in Seat khat chuhin Nomination File mi 15 an awm a. Serchhip-VII a VC seat 5 awm chuh turin mi 15 ten Nomination Paper thehlutin Party pathum ten an chuh kim vek dawn a, Serchhip-VIII VC-a seat 7 awm chuh turin INC, MNF leh ZPM ten Candidate 7 theuh neiin mi 21 in Nomination paper an thehlut a ni.

Seat 5 awmna Chanmari VC thar-ah Party pathum ten seat awm zawng zawng chuhin Hmeichhe atan Seat hauh chuh turin Independent-a Nomination Paper thehlut mi pakhat awmin Nomination Paper thehlut mi 16 an awm a. Darnam VC-a Seat 5 chu INC, MNF leh ZPM ten an chuh vek bakah General Seat chuh turin mi pakhat in Nomination Paper a thehlut a, mi 16 in Nomination Paper an thehlut a ni.

New Serchhip South VC-a Seat 7 awm chuh turin INC, MNF leh ZPM atangin mi 7 theuh ten Nomination Paper thehlutin an vaiin mi 21 ten Nomination Paper an thehlut a, Seat 5 awmna New Serchhip North VC ah INC, MNF leh ZPM atangin mi 5 theuh ten Nomination Paper an thehluh bakah Independent-a General Seat chuh turin mi 3 ten Nomination Paper an thehlut a, an vaiin mi 18 ten Nomination Paper an thehlut a ni.

Chhiahtlang South VC-a Seat 5 chuh turin INC, MNF leh ZPM atangin mi 5 theuh ten Nomination Paper thehlutin Hmeichhe tana Seat hauh pakhat chuh tum Independent Candidate mi pakhat a awm bawk a, Chhiahtlang North VC-a Seat 5 awm chuh turin INC, MNF leh ZPM atangin mi 5 theuhin Nomination Paper ah thehlut bawk a ni.

Heti hian Serchhip Town chhunga Village Council 14-a Seat 74 awm chu INC leh MNF ten chuh kim vekin ZPM ten Seat 5 chuh lovin Seat 69 an chuh dawn a, BJP in Seat khat chuhin Independent-a inthlan chuh tur mi 6 an awm bawk a, mi 224 ten Nomination an file ta a ni.