Serchhip-ah hri kai hmuh belh

Zirtawpni-a ZMC Laboratory-a Swab Sample enfiah zingah Serchhip District atangin hri kai pakhat hmuhchhuah a ni a, Serchhip District-ah hri kai 13 hmuhchhuah an ni tawh.

Serchhip CMO Office atanga thu kan dawn danin Zirtawpni khan Serchhip atang hian Swab Sample 32 chu enfiah turin ZMC Laboratory-ah thawn leh a ni a, heng atang hian hri kai pakhat hi hmuh niin amah hi hnamdang mipa kum 24-a upa, tun thla ni 8-a Badalpur atanga rawn kir niin Company hnuaia hna thawklai a ni a, Chhingchhip-a Quarantine lai a ni a, tun thla ni 10 khan Rapid Antigen Test (RAT) hmanga Test ni tawhin a negative a, amaherawh chu RT-PCR Test neih a nih hnuah hri a kai tih hmuhchhuah a ni leh ta a ni. Hetianga hri a kai tih hmuhchhuah anih hnu hian Inrinni khan Serchhip Tarpi tlang SIRD-a Dedicated COVID Health Centre-ah dahluh nghal a ni.

Heti hian Serchhip District-ah COVID-19 hri kai mi 13 hmuhchhuah an ni ta a, heng zinga mi 7 te chu enkawl dam ni tawhin tunah hian hri kai la enkawl mi 6 an awm a ni. Heng bakah hian BSF Sipai hri kai enkawl tur rawn dah an awm bawk avangin Serchhip District-a hri kai enkawl leh enkawl dam erawh an tam viau thung a, Inrinni khan Thenzawl CCC-a enkawl mi 2 te chu enkawl dam niin tun dinhmuna Serchhip District-a hri kai enkawllai chu 81 an ni ta a, DCHC Serchhip-ah mi 6 enkawl niin Thenzawl-a CCC-ah mi 26 enkawl an ni a, Nursing School-a CCC-ah ZMC atangin BSF sipai hri kai mi 2 rawn dah belh an nih avangin mi 49 enkawl mek an ni bawk.

Comments

Chhiar Hlawhte