Pradhan Mantri Van Dhan Yojana (PMVDY) hnuaia hmalak dan tur Serchhip-ah sawiho a ni

Nimin  khan Serchhip District Bawrhsap, Kumar Abhishek kaihhruaina hnuaiah Serchhip District Level Co-ordination & Monitoring Committee on Pradhan Mantri Van Dhan Yojana (PMVDY) chu thukhawmin he Scheme hnuaia Serchhip District a hmalak dan tur an sawiho.

Serchhip DC Meeting Hall-a he thutkhawm ah hian Serchhip District Level Co-ordination & Monitoring Committee on PMVDY Chairman ni bawk, Kumar Abhishek chuan thingtlang mite thiamthil hmanga ramngaw atanga sum chang thei kan hmuhte mumal taka bawhzuina tur Scheme hi Serchhip District-ah hlawk taka kalpui ngei a tul thu a sawi a. State pawn atanga training thil leh hmanraw chawkluh ngai thil te, tunlai thiamna mila online market-a hralhchhuah dan turah te, branding leh packaging thilah te a tul ang zela tanpui a inhuam thu a sawi a. Eng thil pawh a hralhna hmun tur thlansa neia siam a ngaih avangin he Scheme hnuaia thilsiam turte pawh uluk taka zirchian a pawimawh thu sawiin, a bultan nan khaw palah chauh hma lak ala nih thu a sawi a, “Hei hi rang taka tihpuna, tihzauh a tul a, kan din tawhte pawhin production an neih thuai theih nan an mamawh hmanrua te an neih thuai a tul a ni,” a ti bawk.

He thutkhawm ah hian Member Secretary leh Serchhip-a Asst. Registrar, Cooperative Societies (ARCS), K. Lalduhawma chuan PMVDY lo chhuah dan tlangpui sawiin, Mizoram State-ah chuan Cooperation Department-in an enkawl tur thu a sawi a, Mizoram bikah he Scheme hi July 14, 2020 khan Cooperation Minister, C. Lalrinsanga chuan hawngin July 23, 2020-ah TRIFED nena MoU ziah a nih thu leh Item chi 72-ah Minimum Support Price a nih thute, Item dang 31 pawh proposal siama thehluh a nih thu a sawi bawk.

Serchhip District PMVDY Nodal Officer, Lalrinmawia pawhin he Scheme thar chungchang sawifiahna hi neiin he hmalakna bultan nan hian Serchhip District-a khaw pali-ah Vikas Kendra din tawh an nih tawh thu leh an hmalakna turte sawiin, N. Vanlaiphai-ah Hmunphiah ching-a hma lain, Leng-ah Khawizu, Serchhip-ah Aieng leh Chhuanthar Tlangnuam-ah Aloe Vera te an nih thu a sawi a. Van Dhan Vikas Kendra te hi la tihbelh chhoh zel tur a nih thu a sawi bawk.

PMVDY hi ramngaw hausakna mumal leh hlawk zawka thingtlang mite thiam thil hmanga kalpuina tur ruahmanna a ni a. Hmalakna tur khuaah Self Help Group awmsa te hmanga Van Dhan Vikas Kendra dinin he hmalakna hnuaia thlanbik thil siamchhuah theih an siam chhuak anga, sawrkar laipuiin rampum huapa Nodal Agency atana a ruat Tribal Cooperative Marketing Development Federation of India Limited (TRIFED) kaltlanga hralhchhuah tura duan a ni. Tun dinhmunah Mizoram-ah Van Dhan Vikas 44 din nan Central atangin cheng nuai 581.55 hmuh a ni tawh bawk.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn