Serchhip-a COVID-19 kai enkawl dam vek niin Serchhip District-ah hri kai an awm tawhlo

Serchhip-a COVID-19 hri kai hmuhchhuah zawng zawngte chu enkawl dam niin nimin khan anmahni enkawlna hmun atanga chhuahtir vek an ni a. Serchhip District atanga Swab Sample enfiah tura thawn zawng zawngte pawh an result hriat kim ni tawhin khunghran mek zingah Sample lak tur 39 ala awm bawk.

Thla hmasa, June 19-a Serchhip-a COVID-19 hri kai hmuhchhuah, COVID Care Centre, Serchhip-a enkawl te hi June 26, 2020 khan hri an kai tawhlo tih nemngheh a nih hnuah anmahni enkawlna hmunah hian enkawl zui niin ni 7 chhung enthlak leh an ni a, hemi chhung hian insawiselna an neih loh avangin nimin khan dam takin chhuahtir an ni ta a, heng enkawl dam te hi nufa niin an pahnih hian Maharashtra atanga rawn haw niin Serchhip-a inkhunghranna hmun-a an awm laiin hri an kai tih hmuhchhuah a ni a, hri an kai tih hmuhchhuah a nih atang hian Tarpi tlang-a COVID Care Centre-ah enkawl nghal niin hri lakah an fihlim tih nemngheh a nih hnuah Vawiin khan anmahni enkawlna hmun atang hian chhuahtir an ni ta a ni.
Hetihlai hian Serchhip District atanga hri kai hmuhchhuah hmasa ber leh ZMC-a enkawl tak hmeichhe pakhat pawh ZMC atanga chhuahtir a nih hnuah leh Serchhip-ah ni 7 chhung an khunghran hnuah nimin vek khan chhuahtir a ni bawk a, he hri kai enkawl dam hi June 9, 2020 khan hri a kai tih hmuhchhuah niin hemi ni hian ZMC-a enkawl tura phurhthlak a ni a, tunhnaiah hri lakah a fihlim tih nemngheh niin hemi hnu hian ni 7 chhung inkhunghrang tura tih a nih angin COVID Care Centre-ah hian khunghran leh a ni a, ni 7 chhung a inkhunghran hnuah nimin vek khan chhuahtir a ni ve leh ta bawk a ni.
Nimin-a heng mite thlahna hun hi Serchhip District Medical Superintendent, Dr. ZD. Lalmuanawma, Dr. Lalhlunpuii, SMO leh Dr. K. Lallawmzuala, Specialist, i/c DCHC te chuan an telpui a, Serchhip-a COVID-19 hri kai te enkawlna hmunah hian thawktu Doctor pakhat bakah Nurse leh IV-Grade mi 2 ve ve, an vaiin mi 5 an awm a, heng damlo enkawltute hi khunghran zui rih an ni bawk ang.
Heti hian Serchhip District atanga Swab Sample enfiah tura thawn 466 te chu an result hriat kim vek ni tawhin hri kai hmuhchhuah mi 3 awmin heng te pawh hi enkawl dam vek an ni ta a, Serchhip District chu hri kai awmlohna District a ni ta a ni.
Serchhip District chhungah mahni In lama inkhunghrang mi 28 leh Quarantine Facility-a inkhunghrang mi 27, an vaiin inkhunghrang mi 55 la awm mekin heng zinga mi 39 te chu Sample enfiah tura lak leh hmabak an ni bawk.

Comments

Chhiar Hlawhte