Chief Minister hova Council of Minister thukhawmin Dan siamthatna tur an pawm

Mizoram sawrkar-a Council of Minister te chu nimin khan CM Office Cabinet Room-ah an thukhawm a, he hunah hian sawrkar Department thenkhat atanga sawrkar inrelbawlna atana rawtna pawimawh, Agenda 11 ngaihtuah niin Agenda 9 chu pawm a ni.

Nimin-a Council of Minister thutkhawm-a ngaihtuah zingah hian Dan dinglai siamthatna a awm nual a, The Mizoram (Containment and Prevention of COVID-19) Ordinance, 2020 siamthat rawtna chu pawm niin he Dan siamthatna ang chuan Dan bawhchhia te chu hmun leh hmun ah pawisa chawitir nghal tur an ni a, pawisa chawitur neilo te chu Police Station emaw, Out-Post hnai berah emaw darkar 24 chhung tan tir an ni ang. Hei bakah hian Secretariat-a Officer Post dan phung leh, chak leh awlsam zawka File kal dan siamthatna tur rawtna pawh an pawm a, he rawtna ah hian sawrkar File te chu a kal kual chhung a reiin Officer dawhkan pasarih (7) ngawt te File pakhat hian a kaltlang a ngai thin a, hei hian hna kal lai a tih muan avangin sorkar file in officer dawhkan paltlang tlem tawh se tih a ni.
Hei bakah hian The Mizoram Drug Treatment-cum-Rehabilitation Centre Accreditation Rules, 2019 siam that rawtna te, Mizoram Motor Accidents Claims Tribunal Rules, 2020 pawh pawm niin, sum hman kawnga sawrkar amah leh amah a inthununna dan, Mizoram Fiscal Responsibility and Budget Management Act, 2006 siamthat rawtna pawh pawm a ni a, Court Fees (Mizoram Amendment) Bill, 2020 pawh pawm a ni bawk.
MLA te hlawh leh hamthatna te bakah Loan an lak theihna Dan dinglai siamthat rawtna pawh pass a ni a, Parliamentary Affairs Minister, TJ. Lalnuntluanga chuan zawhna chhangin, Mizoram Salaries, Allowances and Pension of Member of the Legislative Assemble (Eighth Amendment) Bill, 2020 leh, Mizoram Legislative Assembly (Grant of loans and Advances to Members) (Fifth Amendment) Rules, 2020, nimin-a pawm tak te hi MLA te hlawh tihpun emaw, tihhniam tumna emaw a nih loh thu a sawi a. Dan an siam that chu MLA ten loan an lak theih installment 3-a an lak thin chu tumkhata an lak theih tawhna tur leh dahkham ngai tawh lo tura ruahmanna a ni tih a sawi. Loan hi pension hnuah pawh hlawh atanga rulh chhunzawm zel a nih thu leh an thih hnuah loan an lak te chu nuaibo tur a nih tho avangin loan lakna turah dahkham a tul tawh lohna tur a ni, a ti a, Dan hmanlai 2 te chu inkalh theia a lanna lai a awm avanga siamthat a tul thu a sawi bawk.

Comments

Chhiar Hlawhte