Assembly Public Accounts Committee ten Serchhip-a ITI Building sak mek an tlawh

Mizoram Legislative Assembly-a Public Accounts Committee (PAC) chuan nimin khan an Chairman, Lalduhoma MLA hovin Serchhip-a ITI Building tur sak mek chu an tlawh a, helai hmuna hna thawktute chuan he hna hi nakum March thla ah chuan hna zawh hman an beisei thu an sawi.

Nimin-a Serchhip-a ITI Building tlawhtu Assembly Public Accounts Committee Member te hian ITI Building-a Administrative Building sak tawh chin chu fangkualin Classroom leh Workshop tur sak mek te chu an thlir bawk a, hemi hnu hian he hna thawh mek an hmuh dan sawihoin, he hunah hian Lalduhoma chuan Assembly Public Accounts Committee (PAC) chu thil diklo zawngchhuak tur ringawt an nih loh thu sawiin, engtin nge hma kan sawn ang tih ngaihtuahtu an nih zawk thu a sawi a. Dik tak leh tha taka thawktute tan chuan hlauhawm an nih loh thu leh fello taka titute tan erawh chuan hlauhawm tak ni thei an nih thu a sawi a. Tun tumah hian Serchhip-a ITI Building sak mek chu zawh hun tura ruahman, nakum March thla ah zawh a nih theih dan tur an en thu sawiin, a hun taka zawh hman an beisei thu leh a tul anga hma an lak zui zel dawn thu a sawi bawk.
He hunah hian Labour, Employment, Skill Development & Entrepreneurship (LESDE) Department Official te chuan Serchhip-a ITI Building sak mek chu a hun taka zawh a nih theih nan theihtawp an lo chhuah tur thu sawiin, tunah hian Financial Achivement chu 30% leh Physical Achivement chu 40% a nih thu an sawi a. He hna thawk mektu (Contractor) pawhin huntiam chhunga hna hi zawh theih ngei an beisei thu sawiin, an hmabak awm te chu huphurhawm a nih tawhloh thu a sawi a. Kan Palai in a biakna ah Contractor te chuan tunhnaia Lockdown kalpui a nih avangin an hnathawktu tam zawk an haw thu leh tunah hian Mistiri 4 an awm thu sawiin, State pawn atangin tunah hian Mistiri lakluh an tum mek thu leh Labour-ah erawh tualchhung mi chhawr an tum thu a sawi bawk.
Thudawn danin Serchhip-a ITI Building hi Serchhip leh Chhiahtlang inkar, Bukpui ram ah sak tura ruahman niin kum 2014 khan hna hi thawh tan a ni a, amaherawh chu a tir lamah a ram chungchangah hian P&E Department nen thu inhmulo awmin hun engemaw chen hna hi a khaihlak a, hemi hnu hian hna hi thawh chhunzawm niin tunhnaia NH. 54 kawngpui laihzauh tur avangin hun engemaw chen chu hna hi thawh chhunzawm mumal theihloh in a awm leh a, tunah hian Administrative Building tur chu a ruangam sak zawh thawkhat ni tawhin, Zopa chhiara chhawng hnih tura ruahman chu ruahman aia lian zawka sa in chhawng khat ah sak a ni dawn a. Classroom leh Workshop tura ruahman chu chhawng thum-a sak tura ruahman niin hna thawh chhoh mek a ni.
Public Account Committee hian an thil hmuh te hi Report siamin sawrkar-ah an thehlut dawn a ni.

Comments

Chhiar Hlawhte