AH&Vety Department hotute zinkual mek

AH&Vety Department hotute chu tunlai hian Mizoram ramri dep khaw hrang hranga duty te tlawha zinkualin lawmthu sawina an neih bakah tanpuina an hlan.
AH& Vety Department hotute hi Team hnih ah inthenin, Team hnihna Deputy Director (H), Dr. F. Laltanpuia leh Dr. C. Neihthangpuii VO (H&D) te leh anmahni tawiawmtute chuan nimin khan Champhai District chhunga Zokhawthar, Melbuk, Ruantlang leh Tlangsam te tlawhin, Vawiin-ah Zote, Ngur, Vapar leh Hnahlan te an tlawh leh dawn a. Team dang Deputy Director (DI), Dr. M. Zohming-thangi leh Dr. Esther Lalzoliani VO (DI) kaihhruai chuan Mamit District chhunga Kawrthah, Tuidam, Rengdil, Zamuang, Bungthuam leh Kanhmun bakah Kolasib District chhunga Bairabi, Vairengte leh Saiphai te an tlawh tawh bawk a ni.
Heng AH&Vety Department hotute hi kumin March thla-a Assam leh Arunachal Pradesh-a leng leh Vawk Sing hnih chuang zetin an thih phah, African Swine Fever (ASF) ngaihven paha ramri hrula khua te leh duty-te tlawha fehchhuak an ni a. Khawtlang hruaitute nen inkawmhona neiin, inhrilhhriatna leh zirtirnate a tul angin an pe zel a ni.
Kum 2013,2016 leh 2018 a PRRS Vawk natna lengin Mizoram Vawkte nasa taka suatin, Vawk vulhtute dinhmun nasa takin a nghawng chhia a, ram economy pawh a tichhe hle a ni. Tuna ram thenawm maia leng mek ASF (African Swine Fever) hi PRRS ai chuan a nghawng a nasa zual thei hle tura ngaih a ni a. He hri laka kan ram a him theih nan Vawk, Vawksa leh Vawksa atanga siam eitur reng reng Mizoram-a lut tur dan chu sawrkar in ngai pawimawhin, District tina District Magistrate ten Vawk, Vawksa leh Vawksa atanga siam eitur reng reng lalut lo turin thupek an chhuah reng bawk a. Heng thupek te tih hlawhtlinna atan hian ramri-a Duty te an pawimawh tih hriain tun tumah hian Vety Department hotute hi an zinkual a, lawmthu sawina atan Rs. 5000/- theuh an hlan a ni.

Comments

Chhiar Hlawhte