ZMC-ah COVID-19 kai hmuhchhuah thar awmlo; Mi 8 ten damdawi In an chhuahsan thung

Niminpiah khan Zoram Medical College (ZMC) Laboratory-ah Sample 814 enfiah leh niin heng zingah hian COVID-19 kai hmuhchhuah an awm lova, Sample enfiah zingah hian Serchhip District atanga thawn 89 pawh a tel a ni. Hetihlai hian ZMC-a COVID damlo enkawl mi 8 te chu nimin khan damdawi In atanga chhuahtir an ni thung.

Mizoram Sawrkar thuchhuah in a tarlan danin niminpiah a ZMC Laboratory-a Sample enfiah 814 te hi Mipa Sample 384 leh Hmeichhe Sample 430 te a ni a, heng bakah hian a hma ni-a Sample enfiah, result tarlan hmanloh 107 te pawh heng zingah hian a tel a, an vai hian a Negative vek tih tarlan a ni. Niminpiah a Sample Test zingah hian Lawngtlai District 87, Aizawl District 69, Saitual District 72, Champhai District 171, Serchhip District 89, Lunglei District 260, Khawzawl District 60 leh ZMC-a damlo enkawl mek 6 an tel a ni.

Tun tuma Serchhip District atanga Sample thawn result hriat tak te hi a tlangpuiin Govt. Serchhip College leh Eklavya Model Residential School-a khunghran mek te an ni a, heti hian Serchhip District atang hian Sample lakkhawm zawng zawng chu 385 niin heng zinga 357 chu ZMC-ah enfiah tura thawn a ni tawh a, tunah hian Sample 279 chu result hriat ni tawhin result ngaihchan lai 78 a awm a ni.

Hetihlai hian ZMC-a COVID-19 damlo enkawl mek zinga mi 8 te chuan nimin khan dam takin damdawi In an chhuahsan ta a. Heng mi 8 te hi June thla tir-a COVID-19 kai hmuh-chhuah leh ZMC-a enkawl tak mi 8 niin nimin chawhnu khan ZMC hi an chhuahsan a, heng mite hi Kolasib District mi 6 leh Aizawl District mi 2 niin an dam ngei a ni tih nemngheh nan darkar 24 chhungin RAT-PCR Test vawi hnih an negative a ni a, mipa pakhat leh hmeichhia 7 niin an vai hian ZMC Isolation Ward-ah June 2 khan dahluh an ni.

Heng ZMC chhuahsantu mi 8 te hi ni 7 chhung Quarantine chhunzawm an ni dawn a ni. Heti hian Mizoram-ah COVID-19 kai hmuh-chhuah mi 130 awm tawhin mi 9 te chu enkawl dam an ni tawh a, tunah hian mi 121 enkawl mek niin nunna chan an la awmlo a ni.