Khunghran mek te tan thilpek hlan awm zel

Serchhip District chhunga inkhunghrang mekte tan nimin khan Piler leh Chhingchhip Mualpui VLTF te chuan eitur chi hrang hrang hlanin, Mizoram Secondary School Teacher Association, Serchhip Sub-Hqrs. in DLFT tanpuina an hlan bakah Chhiahtlang Kawn Veng Branch YMA in CM Relief Fund-a dah tur sum an hlan bawk.

Serchhip District chhunga COVID-19 avanga inkhunghrang mek te tan hian Piler VLTF te chuan Antam bag 6, Tomato Kg. 4, Theite Kg. 17, Theihai Kg. 8 leh thingfak thahnem tak chu nimin khan Serchhip Addl. DC, HD. Lalpekmawia hnenah an hlan a, hemi rual hian Piler Primary School Headmaster, Lalkima'n a tul apianga hman atana a thawh Rs. 2000/- chu Piler VLTF aiawhin an Chairman leh VCP, PC. Lalzuimawia chuan a hlan a ni.

Nimin vek khan Chhingchhip Mualpui Kohhran Pavalai Pawl chuan Antam Tel 70, Maian tel 10, Theite Kg. 5, Theihai Kg. 10, Nimbu Kg. 2, Iskut Kg. 1 , Hmarcha Kg. 2 leh pawisafai Rs. 5000 chu a tul ang anga hman atan Addl. DC, HD. Lalpekmawia hnenah hian an hlan bawk a ni.

Mizoram Secondary School Teacher Association (MISSTA) Member ten COVID-19 dona atana an thawh tlingkhawm atanga District hrang hrangah cheng nuai khat theuh pek an rel angin nimin vek hian MISSTA Sub-Hqrs. Serchhip hruaitute chuan Serchhip DC, Dr. Lalzirmawia Chhangte kutah cheng nuai khat an hlan bawk a. Chhiahtlang Kawn Veng Branch YMA pawhin CM Relief Fund a chhunluh turin Rs. 5000/- an hlan bawk a ni.

Serchhip District Bawrhsap chuan thilpek petute zawng zawng chungah lawmthu sawiin, an inpekna leh insensona te chuan sawrkar hmalakna a tizangkhai a, thawktute ah phurna nasa tak a pek thin thu leh an tangkai pui thin hle tih a sawi bawk.