Champhai Sub-Hqrs. YMA te cheng nuai khat hlan

Serchhip Sub-Hqrs. YMA chuan COVID-19 avanga ramri hrul-a Duty te mamawh apianga hman turin nimin khan Champhai Sub-Hqrs. YMA hnenah cheng nuai khat an hlan.

Serchhip Sub-Hqrs. YMA hian hripui leng avanga inkhar-khip kalpui a nih tantirh khan Serchhip Town chhunga YMA Branch hrang hrangte kaltlangin Duty-na ah Ramri Veng-a Duty te pual hian Thawhlawm thawhna Bawm a lo hung tawh a, hemi hnu hian khaw hrang hranga mi tlawmngai leh VLTF te chuan ramri-a Duty te pual hian Serchhip Sub-Hqrs. YMA kaltlang hian sum leh pai an thawh zel a, heng mi inphal te thawh-khawm atang hian nimin khan Champhai Sub-Hqrs. YMA te hnenah cheng nuai khat hi Bank Account hmanga thawnin, kan ram leh hnam himna atana an inpekna te chu an ngaihhlut zia leh an thawhrimna an ngaihsan zia entirtu atana lo pawm sak turin an ngen bawk a ni.

Hemi hmalam hian heng mi inphal te sum leh pai thawhkhawm atang hian Serchhip Sub-Hqrs. YMA hian Mamit Sub-Hqrs. hnenah Rs. 1,09,281/- leh Kolasib Sub-Hqrs. YMA hnenah Rs. 1,00,000/- hlanin Tuichangral South Group YMA Duty te tan Rs. 30,000/- leh Rs. 1400/- hu hmanrua an lo pe tawh bawk a. Tunah hian sum hlan bang Rs. 27,560/- ala awm mek a, hei pawh hi a tul angin COVID-19 dona atan hman leh tur a ni ang.

Nimin vek khan Sub-Hqrs. YMA Cham-phai hian Serchhip Sub-Hqrs. YMA hnenah hian lawmthu sawina lehkha rawn thawn nghalin Serchhip Sub-Hqrs. YMA chu an hmalak zelna turah duhsakna an hlan nghal bawk a ni.