Serchhip District-a COVID-19 dona kawnga hmalak dan hrang hrang thlirho a ni

Serchhip District Task Force on COVID-19 chu nimin khan an Chairman Serchhip DC, Dr. Lalzirmawia Chhangte, IAS hovin DC Meeting Room-ah an thukhawm a, Lockdown hmabak awm leh tur leh chumi atana dan hrang hrang te thlirin Serchhip District dinhmun te an sawiho bawk.

He thutkhawm ah hian Bawrhsap chuan Serchhip District mipuite thuawina leh sawrkar an thawhpui thatna avangin COVID-19 laka invenna hmalakna hrang hrangte a kaltluang hle tih sawiin, Sawrkar hnathawk, COVID dona kawnga mawhphurhna hrang hrang neitute thawhrimna fakawm a tih thu leh hna la awm te pawh tha taka thawk zui zel turin a ngen bawk.
Bawrhsap chuan Lockdown thar, June ni 30 thleng atana puan thar leh kalpui dan chungchang ah ram pum huap dan leh Mizoram bik dan hriatpawlh hlauhawm tlem a awm tih sawiin, rampum huapah June ni 8 atanga sakhaw hmunte hawn theih tih a nih laiin Mizoram-ah chuan inkhawm leh punkhawmna lam chi khap zel a la ni a, inneih leh mitthi vuiah mi 20 chin erawh phal theih a ni tih a sawi a. Zan curfew chungchangah pawh rampum-ah zan dar 9:00 atangin tih a nih laiin Mizoram-ah chuan zan dar 7:30 atanga zing dar 4:30 a ni thung tih a sawi a. Mi 5 aia tam punkhawm khap thupek chu ala nung reng tih pawh sawiin, Lockdown dan thar hriatpawlh hlauhawm zual nia a hriatte a tarlang a, sawrkar leh mimal Office-a thawkte chuan Aarogya Setu-a in register vek tur a nih thu a sawi a. Mipuite hriattur thuthar thehdarh kawngah fimkhur a tul thu leh mipuite tithlabar thei thil laka inven tha a tih thu a sawi bawk.
He hunah hian Report hrang hrang ngaih-thlak niin Serchhip District chhunga Quarantine Facility Centre te chu Medical Incharge ten nitin an tlawh thu te, COVID-19 kher ni lo natna danga harsatna an neih te pawh ngaihven reng an nih thu te, Facility-a awm zawng zawng leh lo haw leh turte zawng zawng pawh Rt-PCR test vek tawh tur a nih angin Swab Cample hi nimin atangin an lakhawm tan a nih thu leh tunhnaia lo haw RAT Reactive te pawh Vawiin-ah an Rt-PCR Result hriat theih beisei an ni tih tarlan a ni.
Serchhip Police ten Centre tinah Security duty an dah vek  thu leh State pawn atanga rawn haw zingah Serchhip District chhung paltlang zawng zawng te venhimna (escort) an pek vek thu pawh he hunah hian tarlan niin COVID-19 dan bawhchhia Police ten an man tawh zawng zawng mi 420 te atanga pawisa chawi (fine) tlingkhawm chu Rs. 70,000 a tling tawh bawk a. Heng bakah hian VLTF te pawhin mi engemaw zat chawi tir tawhin an chawitir zat erawh chiang taka hriat theih a ni lo thung.
Tun dinhmunah Serchhip District mi, State pawn-a tangkhang lo haw tawh zawng zawng chu mi 290 nia chhinchhiah a ni a, an zinga 79 ten inkhunghranna hun an hmang zo tawh a, khung mek mi 211 la awmin an zinga 7 hi mahni In a inkhunghran phalna pek an ni. Lo la haw tur hriat theih chinah 100 aia tam deuh la awmin la pung zel thei a ni thung.
Hetihlai hian State pawn lam mi Ser-chhip District chhunga tangkhang te pawh lak-khawm an nih thu leh tunah hian mi 152 te chu thawnhaw an nih tawh thu leh tuna la tangkhang mek mi 530 an awm thu he hunah hian tarlan a ni bawk a, heng mite hi Construction company hnuaia hnathawk an ni deuh vek niin a hranpa a ei leh in pek ngai an awmlo thung.
Nimin-a thukhawm-ah hian District Task Force Member te an tel tha hle a, hmalakna tur hrang hrang an ngaihtuah zingah Serchhip District chhunga Quarantine Facility a awm te ti zangkhai thei thil engemaw ngaihtuah tha ti tlangin, hemi atana remchang tur thil hi ngaihtuah tura ruahman a ni bawk.

Comments

Chhiar Hlawhte