Serchhip District mi State hrang hranga tangkhang ten Serchhip an rawn thlen belh zel

Inkharkhipna kalpui a nih avanga State pawn-a Mizoram mi tangkhang hruai haw te chuan Mizoram rawn thlen belh zelin Serchhip District mi leh sa te pawhin Serchhip an rawn thleng zel.
State pawn-a Mizoram mi hruaihaw mekah hian New Delhi-a tangkhang mi 1436 te chuan Inrinni zan zanlai velah khan Rel hmanga Bairabi Rel Station rawn thlengin Kolasib DC hovin sawrkar mi pawimawh ten an lo dawngsawng a, Rel atanga an chhuk veleh Screening Point hrang hrang 10 ruahman sa ah endik nghal niin Aizawl District a cheng mi 597, Champhai District mi 106, Hnahthial District mi 6, Serchhip District mi 48, Khawzawl District mi 37, Kolasib District mi 90, Lawngtlai District mi 117, Lunglei District mi 110, Mamit District mi 60, Saitual District mi 30 leh Siaha District mi 235 an ni a, an dinhmun enfiah sak an nih hnuah Bus hmangin an District theuh panpui nghal an ni.
Bairabi-a Screening-ah Serchhip District mi 48 an awm nia chhinchhiah a ni laiin nizan khan Serchhip-ah mi 47 rawn phurh thlen niin heng mite hi Serchhip Kawnpui Kohhran Jubilee Hall-ah khunghran tura ruahman an ni a, mi 4 te chu In lama inkhunghrang tura tih niin mi pakhat chu Isolation-ah dah a ni a, Community Quarantine Centre-ah mi 42 dah an ni a. Ni 14 khunghran an nih chhung hian Serchhip Kawnpui Kohhran chuan an ei leh in an tum sak vek dawn bakah venhimna hnathawktute pawh an pui nghal dawn bawk a ni.
Hetihlai hian Karnataka atanga Rel hmanga rawn haw te chuan Zirtawpni zing-a Bairabi an rawn thlen hnuah Inrinni zing khawvar hma khan Serchhip rawn thlengin anmahni dahhranna tura ruahmanah dahluh nghal an ni a, Karnataka atanga Serchhip District mi rawn haw te hi an vaiin mi 51 niin mi 46 te chu Marian H/S a Community Quarantine Facility-ah dahluh an ni a, mi 3 (chhungkua) te chu Khawtetlang-a Tourist Lodge-ah dahluh niin midang pahnih te erawh chu Home Quarantine tura tih an ni thung a, an hriselna enfiah sak an nih hnuah mi 2 te chu an an sample lak tura ruahman an ni.
Inrinni chhun-a Bairabi rawn thleng Gujarat, Madhya Pradesh leh Andra Pradesh atanga rawn haw mi 36 te pawhin Inrinni zing khawvar hnu khan Serchhip an rawn thleng ve leh bawk a, heng mite hi Govt. Serchhip College-ah mi 29 leh Tourist Lodge-ah mi 7 dahluh an ni a, heng mite hi an hriselna dinhmun enfiah leh niin an zinga mi pakhat chu a sample enfiah zui ngai tur nia thudawn a ni bawk.

Comments

Chhiar Hlawhte