MZP in Zampui tlangdung-a Bru dah tumna dodal

MZP chuan Tripura sawrkar-in Tripura ram chhunga Bru te inbenbelna hmun atan Mizote ram, Zampui Tlang dung hman a tum nia an hriat avangin an duhlo hle tih an sawi a, theihtawp-a do an tum tih an sawi.
MZP General Hqrs. hruaitute chuan Inrinni khan Aizawl-a an Pisa ah thuthar lakhawmtute kawmin, Jan. 16, 2020-a Tripura Bru te an awm hlenna tura Central Sawrkar, Tripura sawrkar leh Mizoram sawrkar-in remna thuthlung an ziak chu lawmawm an tih thu an sawi a. Chutih laiin Tripura sawrkar-in Tripura ram chhunga Bru te inbenbelna hmun atan Mizote ram, Zampui Tlangdung hman a tum chu an duh lo hle tih hi sawiin, Zampui tlangdung-a Bru te dahngheh an nih lohna tur hian hma a la zel dawn tih an sawi a ni.
MZP chuan Bru, Mizorama awm duhlo te leh Zampui-a Zofate inhnaih taka an awm tlan chu hun lokal zel tur atan thil tha aiin thil thalo a hringchhuak zawk dawna an hriat avangin Bru tan pawh Zampui area-a an awm chu an hmalam hun atan a thalo zawkin an ngai tih an sawi a. Hmasang atanga Zofate luah ram, Sakhan tlang leh Mizo khaw 7 a Zofate In leh lo chu Bru te hian chhuhsakin an lo umchhuak tawh a, Zofate luahchin ram hi Bru te avangin khap khat pawh chan leh MZP chuan a remti tawh lo a, Zampui Tlangdunga Bru khaw thar din tuma hmalak mekna chu a tawp thlengin an do zel dawn tih an sawi a ni.

Comments

Chhiar Hlawhte