Latest News

Mizoram Rajya Sabha MP thlanna neiin MNF Candidate K. Vanlalvena thlantlin a ni

Mizoram in Rajya Sabha-a Seat khat (1) a neih hnawhkhahna atan nimin khan inthlanna neih a ni a, nimin tlai-a Vote tla chhiar nghalah MNF candidate, K. Vanlalvena chu tlingah puan a ni.
Rajya Sabha member thlanna hi nimin zing dar 9:00 atang khan Aizawl Treasury Square-a Assembly Secretariat Committee Room-ah neih a ni a, ZLP Leader, Lalduhoma chuan Vote thlak hmasa berin hemi hnu hian MLA dang ten Vote an thlak zui a, MLA 40 zingah mi 39 ten Vote thlakin MLA zingah BJP MLA neih chhun, Dr. BD. Chakma chuan Vote a thlak lo a ni. Mizoram-a MLA nei Political Party zingah BJP chu he inthlanna chuhlo awmchhun a ni a, Rajya Sabha member thlannaa an MLA neih chhunin vote a thlak loh chungchanga zawhna chhangin BJP Mizoram Pradesh President, Vanlalhmuaka chuan, an party-in Candidate an neih loh avanga Vote tur bik an nei loh avangin an MLA hian vote a thlak loh thu leh Dr. BD. Chakma hi Aizawl-ah a awm loh thu a sawi bawk.
He inthlanna-a vote tla te hi nimin tlai khan chhiar nghal niin Candidate zingah rorellai MNF candidate, K. Vanlalvena'n Vote 27 hmuin hneh taka thlantlin a ni a, ZPM Candidate, B. Lalchhanzova'n vote 7 leh Congress Candidate, Dr. Lallianchhunga'n Vote 5 an hmu bawk a ni.
K. Vanlalvena hi K. Lalzika fapa niin January 14, 1970 khan Serchhip District chhunga East Lungdar khua ah a piang a, a thenawm North Mualcheng khua ah a seilian thung. North Mualcheng-ah hian zirna bul tanin Primary School a zir zo a, Middle School chu North Mualcheng leh Dawrpui Vengthar Middle School-ah a zir zo thung a. High School chu East Lungdar-ah leh R.M High School, Aizawl-ah zir zovin PU Science leh B.Sc chu Pachhunga University College atangin a zo bawk a ni. High School leh College a kal laiin Students' Union hruaitu atan thlanthin a ni a, mi kaihhruai theihna nei tha tak a ni. MZP General Headquarters-ah President term khat leh Vice President ah term thum atan thlantlin a ni tawh a. Kohhran rawngbawlna lamah Mizoram UPC Kohhran ah kum 2009 khan Upa atan thlan a ni bawk.
Ram leh Hnam vei mi a nih avangin Politic-ah lut chhovin, Mizo National Front (MNF) a zawm a, MNF General Headquarters-ah |halai President term khat a chelh zawh hnuin, General Secretary hna a chelh leh a, tunah hian MNF General Headquarters ah National Core Committee Member nilai a ni a. Kum 2015 MLA Bye Election-ah khan Aizawl North-III bial ah MNF Official Party Candidate niin khatihlaia Rorellai party Congress candidate chu a hneh lo thung a, tunah chuan Mizoram Rajya Sabha MP atan thlantlin a ni ta a ni.

Comments

Popular News (Last 30 Days)