Chanchin thar thenkhat :

MZP in lawmthu sawi

Mizo Zirlai Pawl (MZP) General Hqrs. chuan nimin khan Chief Minister, Zoramthanga chu a Pisa-ah kawmin Draft Mizoram Civil Service (Combined Competitive Examination) Rules 2020-a kum bithliah awmsa, kum 35 (40 yrs for ST) chu kum 32 (37 yrs for ST) a tihhniam tura rawtna awm leh tih danglam tumna awm chu tha a tih loh thu leh a dodal thu an lo thlen tawh thin hlawhtlinna an hmu chu lawmawm an tih thu an sawi a. Tunhnaia MPSC advertisement No. 2 of 2019-2020 dt 21st June 2019 in Health & Family Welfare Department hnuaia Grade III of MHS under AYUSH Sub-Cadre lak tur Screening a neih danah diltu thenkhat Screen Out anih chung-chang ennawn sak leh tura Chief Minister hnena an ngenna tih hlawhtlin a ni chu lawmawm an tih thu an sawi bawk. MZP hian nimin vek khan COVID-19 dona atan Chief Minister Relief Fund-ah Rs 10,000/- an chhunglut bawk.

Electric man boral
Nimin chawhnu dar 1:30 vel khan Thenzawl Farm Veng-a cheng, R. Thlamuana (72) mi chu Ar In-a Electric eng a pekna hrui a siamthatna ah Electric in manin a boral. Thudawn danin R. THlamuana hi Electric Current in a man hnu hian nikhaw hre lovin a awm nghal a, Thenzawl Damdawi In panpui nimahse chhan theih a ni ta lo a, vawiin ah vuiliam a ni ang.

Volunteer tan nuai 2 hlan
Hachhek bialtu MLA, Lalrindika Ralte chuan Mizoram hmun hrang hranga COVID-19 dona kawnga in volunteer, Nurse, Laboratory Technician leh thiamna hrang hrang neite lawmman atan nimin khan Health Minister Dr. R. Lalthangliana hnenah ama pawisa Rs. 2,00,000/- a hlan a, he pawisa hi Health Minister chuan Health Department hotute hnenah a hlan nghal a ni.

Duty chesual boral
COVID-19 hri leng avanga ramri-a Duty, May 15-a chawhchhun ei tura a haw lirthei atanga tlaa hliam tuar, Lalpianvula (65), Zawlnuam Bawrai Veng chu nizan dar 7:00 khan Aizawl Civil Hospital-ah a boral.

Cheng nuai 10 chhunglut
Mizoram Secretariat Service Association (MSSA) Member ten sum an thawhkhawm cheng nuai 10 chu nimin khan Chief Minister's Relief Fund for COVID-19 an chhunglut a, a hmain Rs. 1,50,000/- an lo chhunglut tawh bawk a ni.

Cheng nuai 201.80 pechhuak
Committee on Utilization of Chief Minister’s Relief Fund for COVID-19 chuan CM Relief Fund atangin Rs. 2,01,80,000/- pekchhuahna tur an ruahman a, Central YMA leh YMA Sub-Hqrs. 5 tan Rs. 30,00,000/-; YLA, MTP leh CYCA tan Rs. 9,00,000/-; District 11-a inkhunghranna te tan Rs. 1,61,50,000/- bakah VLTF Duty hliam tuar tanpuina, Grace Rescue Ministry tan leh State 2-a Mizo Union tan Rs. 1,30,000/- ruahman a ni bawk.

Sports Minister in ZMC tlawh
Sports Minister, Robert Romawia Royte chuan nimin khan Zoram Medical College, Fal-kawn tlawhin thawktute nen inkawmna an nei a, Sports Minister chuan ZMC-ah Indoor Stadium, Volleyball Court, Basketball Court leh Futsal/Football Ground te Externally Aided Project atanga sak a nih tur thu a sawi a, infiamna bungrua chi hrang hrang chu ZMC-a thawktute tan a hlan nghal bawk.

Comments

Chhiar Hlawhte