Mizoram-a inkharkhipna kalpui mek chu June 30, 2020 thleng kalpui chhunzawm a ni dawn

COVID-19 avanga Mizoram-a inkharkhipna kalpui mek chu zanin zanlai-a a tawp dawn hnuah Mizoram sawrkar chuan tun thla tawp, June 30 thleng inkharkhip kalpui leh turin a rel a, hemi atanhian nimin khan Order pawh tihchhuah nghal niin inkaihhruaina pawh tihchhuah nghal a ni bawk.

Hemi chungchangah hian nimin, June 21, 2020 khan Mizoram Chief Secretary leh State Disaster Management Authority-a State Executive Committee Chairman ni bawk, Lalnunmawia Chuaungo chuan thuchhuah siamin March 25, 2020 atanga rampum-a inkharkhipna kalpui mek a nih thu leh Mizoram Sawrkar in June 22, 2020 thlenga Total Lockdown kalpui tura tun thla ni 8-a Order a siam chu Mizoram-a COVID-19 hri
len dan boruak thlirin June 30, 2020 thleng pawhsei leh tul tih a nih thu a tarlang a. Hemi ang hian inkharkhipna hi June 30, 2020 thlengin kalpui chhunzawm a nih dawn thu tarlangin, inkaihhruaina lo siam tawh te thlakna turin kaihhruaina thar pawh a tichhuak nghal a ni.
Lockdown kaihhruaina tihchhuah thar ah hian tuna kalphung pangngai nena danglam lutuk a awm lem lova, International leh Inter-State Boundary te chu khar chhunzawm zel tura tih niin Bairabi, Vairengte leh Kanhmun kaltlang kawngpui te erawh chu sawrkar phal chin bung-raw lakluhna hawn leh a ni dawn a, bungraw chi hrang hrang lakluh dan tur pawh a hma ang bawk in ruahman a ni leh bawk.
Sumdawnna hmun khuahkhirh danah thil tih danglam a awm lova, zirna In leh Sakhaw biakna te pawh khar chhunzawm ala ni dawn a, mi 5 aia tam punkhawm pawh khap chhunzawm a nih dawn bakah zan dar 7:30 leh zing dar 4:30 inkarah pawnchhuah khap a ni leh bawk anga. AMC Area, District Hqrs. leh DC ten Containment Area-a an puan ah te chuan phalna neilo te tan mahni In leh Compound chhuahsan phal a ni lova, pawn-a chhuak turte chuan hmai tuam ngei ngei a ngai chhunzawm zel dawn a ni.

Comments

Chhiar Hlawhte