Lockdown Duty hriselna ngai pawimawh turin chah

Mizoram sawrkar Home Secretary chuan Director General of Police, Mizoram leh District tin DC te hnenah lehkha thawnin Lockdown Order kenkawh leh bawhzuina kawnga duty tura tirhte hriselna ngaihven turin a ngen.

Hemi chungchanga lehkha a thawn ah hian Home Secretary chuan COVID-19 hripui leng mek dona kawnga Mizoram Sawrkarin inkharkhipna thupek a chhuah te bawhzui leh kenkawh hna chu Police te leh Local/Village Level Task Force Volunteer ten ngawrh takin an thawk mek tih tarlangin, amaherawhchu, vanduaithlak takin tunhnaiah Police leh VLTF/LLTF mi leh sa te zingah damlohna avanga nunna hial chan an awm ta zeuh zeuh chu sawrkar chuan pawi a ti takzet tih a tarlang a. VLTF/LLTF te tan inkaihhruaina-ah chuan ‘LLTF/VLTF hminga duty tur chu hrisel tha pangngai ni thei hram sela. Tin, kum lama upa, a bikin kum 60 pel tawh te chu duty tur a chhuah tir loh nise’ tih a ni tih tarlangin, he inkaihhruaina hi uluk taka lo kengkawh turin leh hriselna pan leh derthawng sa, natna benvawn nei te chu duty turin - a bik takin ramri-a duty tur phei chuan tirh chhuah loh nise tiin Home Secretary chuan a chah a ni.

Hetiang bawk hian Police duty turte pawh an hriselna azirin an duty-na tur siamrem nise tiin, ramri ven duty chu mi hrisel tha pangngai leh hriselna lama insawiselna neilo te chauh in tirchhuak turin a ti a. Ramri-a duty laia damsamlohna nei te chu a rang thei ang bera damdawi lam mithiamte rawna, rang taka enkawl zui an nih theihna atan hma lo la turin Home Secretary chuan ngen bawk a ni.