Hnathawk turin inpe leh

Health Worker Training chhuak, Samuel Lalrindika s/o Lalsangliana (L), Chhiahtlang Chhim Veng chu COVID-19 dona kawnga a tul anga thawk turin nimin khan Serchhip CMO, Dr. Laldawngliana Sailo hnenah a inpe a, Serchhip CMO chuan Samuel Lalrindika chungah lawmthu sawiin, tangkai taka thawktute a tanpui theih tur thu a hrilh a, koh mai theih tura lo inring rih turin a chah a ni.

Serchhip CMO, Dr. Laldawngliana Sailo chuan COVID-19 avanga Serchhip District a khunghran mekte Swab Sample lak tur te hi nimin lamah lak zawh tura ruahman a nih thu sawiin, hei vang hian hnathawh zel dan tur hi la ruahman leh rih tur a nih thu a sawi bawk.

Thenzawl Vengthar-a cheng, V. Lalhruaitluangi (25) D/o V. Rothuama chu COVID-19 dona kawnga a tul anga thawk turin nimin khan Then-zawl Community Health Centre-ah a inpe a, amah hi Laboratory Technician training zo tawh niin hun engemaw chen chu Private Clinic-ah te pawh lo inhlawh tawh a ni a, COVID-19 dona kawnga Thenzawl-a Mask thui hna thawktute zingah pawh a lo tel tawh bawk a ni.