Latest News

WATSAN Committe training

PHE Serchhip WATSAN Division hnuaia WATSAN Committee te tana Training chu nimin khan Serchhip P&E Veng YMA Hall-ah neih leha zawhfel a ni a, he training-ah hian Serchhip Sub-Division huamchhunga WATSAN Committee Member te an tel a ni. Hemi hmalam hian East Lungdar Sub-Division huamchhung ami te tan East Lungdar-ah leh Tlungvel Sub-Division huamchhung ami te tan Tlungvel-ah te neih a ni tawh a ni.

Goa atangin mi 49 ten Serchhip an rawn thleng

Rampawn-a tangkhang hruai haw mekah Goa atanga rawn haw Serchhip District mi 49 te chu nimin zing khan Serchhip rawn thlenpui niin an hriselna dinhmun enfiah sak nghal an ni.
Niminpiah-a Mizoram-a rawn thleng Goa-a tang-khang te hi niminpiah tlai khan an awmna tur District theuh panpui nghal niin Serchhip District mi leh sa, mi 49 te pawh nimin zing khawvar hma khan Serchhip rawn thlenpui an ni a, heng mite hi mipa 11 leh hmeichhia 38 niin Eklavya Model Residential School-a Quarantine Centre-ah dahluh nghal vek an ni a. Heng mite dahluh an nih hma hian a awmna tur hi damdawi hmanga tih thianghlim hmasak vek niin an hriselna din-hmun enfiah sak nghal vek an ni a, ngaihtuahawm awm lovin sawrkar ruahmanna siam thar angin an Sample erawh lak vek an ni dawn a ni.
Hetihlai hian nizan-a Mizoram rawn thleng tura beisei, Mumbai leh Pune atanga lo haw te chu kawng lakah Rel a chhiat avang leh siamthat hun chhung a rei dawn avangin Mizo-ram sawrkar chuan Assam sawrkar dawrin Bus hmanga rawn haw pui dan ngaihtuah mek a. Heng mite lo dawngsawng tur hian inbuatsaihna pawh peihfel a ni tawh bawk.

Comments

Chhiar Hlawhte