Chanchin thar thenkhat :

Thlai tiak sem dawng duhlo

Mamit FOCUS hnuai atanga Mamit Luang-pawl Veng leh New Mamit a loneitu chhungkaw 10 ten Serthlum tiak kung 1000 an dawn chu phun tlakah an ngaih loh avangin an dahlet a, heng Serthlum tiak te hi a chhia in a sawngnawi bakah zung nei mumal lo a tam avangin phun tlakah an ngai tih an sawi a, hemi avang hian an dah let leh a ni. Mamit FOCUS lam chuan Serthlum tiak te hi Laltawiliani, Aizawl Chanmari Veng supply niin, serthlum tiak te hi Assam atanga lak anih thu leh heng Serthlum tiak te hi tunkar chhung hian a thar a thlak leh vek tur anih thu an sawi. Mamit FOCUS hnuaiah hian Mamit District chhunga chhungkaw 230 te hnenah Serthlum tiak 23,000 sem tur a ruahman a ni.

Hetihlai hian Mamit khaw bul North Sabual khua a chhungkaw 5 te chuan FOCUS hnuai atanga Kuhva tiak 2500 an dawn te chu a te in a chhe hle niin an sawi bawk a, phun pawh nise a nung zo dawn a an hriat loh avangin phun tlakah an ngai lova, an dah kir ve bawk a ni.

Sangha chi sem tur hnawl

Mamit District chhunga khaw pasarih sem tur Sangha chi nuai hnih (2) zet chu Saikhawthlir khua-a an endik hnuah Inrinni khan hnawl a ni. Thudawn danin Mamit District chhunga khaw 7, Saikhawthlir, Chuhvel, Kananthar, Sihthiang, Rengdil, Zamuang leh Kawrthah khua-a Sangha chi sem tura ruahman nuai 2 chu mamit DC, Dr. Lalrozama leh Fisheries Department hotute bakah Sangha chi Supplier MIFMA te chuan an endik hnuah an hnawl a, Mamit DFDO, C. Lallianpuii chuan Sangha chi chu a len zawng 60 mm atanga 80 mm tur anih thu sawiin, tuna an ken chu a te lutuk tih a sawi a, Sangha chi kengtute chu Department Supply Order ang an ken loh avanga hnawl a nih thu a hrilh bawk. MIFMA chuan Lockdown avanga Sangha chi chahluh a harsat thu an sawi bawk.

Hri kai hmuh belh zel an ni

Zirtawpni khan ZMC Laboratory-ah Sample 954 enfiah leh niin heng atang hian COVID-19 hri kai hmuhchhuah mi 10 an awm a, Inrinni khan Sample 638 endik leh niin hri kai hmuhchhuah mi pakhat a awm leh bawk. Heti hian nimin thleng khan Mizoram-ah COVID-19 kai hmuhchhuah mi 141 an awm tawh a, heng te hi mipa 66 leh hmeichhia 75 te niin hri kai zinga mi 9 te chu enkawl dam an ni tawh a, mi 132 chu enkawl mek an ni thung.

Inrinni-a ZMC Laboratory-a Sample enfiah zingah hian ZMC-a COVID-19 vei enkawl lai Sample 10 endik nawn an tel a, heng zinga 9 te chuan COVID-19 an kai tawh lo tih hmuh-chhuah a ni a. ZMC-a COVID-19 enkawl mek hri kai leh tawhlo te hi damdawi In an chhuahsan veleh Official takin dam a puan an ni ang.

Champhai-ah mi 4 dam tawh

Champhai District-ah COVID-19 kai hmuh-chhuah tawh mi 5 zinga 4 te chu enkawl dam an nih hnuah hri kai hmuhchhuah thar mi 3 an awm leh a, heti hian Champhai District-ah hian hri kai enkawllai mi 4 an awm mek a ni. Heng hri kai enkawl dam mi 4 te hi Champhai District Hospital kiang-a Nursing School Quarantine Centre a mite an ni a, fimkhur thilah ni 7 dang Doctor ten an la enkawl zui dawn a ni. Champhai North bialtu MLA, Dr. ZR Thiamsanga chuan Cham-phai-ah COVID-19 vei leh vei loh test na, Mini RT-PCR an tih mai, Truenat Quatro din thei tura hmalak anih thu leh endiktu ten an enfel tawh thu a sawi a, tun atanga hun reilote ah COVID-19 mai bakah natna dang Hepatitis, Typhoid, TB, Malaria leh natna dangte thlenga finfiah thei khawl bunfel tum a ni, a ti bawk. 

Dan bawhchhia man tam tawh

The Mizoram (Containment and Prevention of COVID-19) Ordinance, 2020 hnuaiah Mizoram pumah dan bawhchhia mi 11,475 man an ni tawh a, heng mite pawisa chawi tling-khawm chu Rs. 24,62,800/- a tling tawh bawk.

MPC in lawmpuina hlan

Mizoram Rajya Sabha MP thlanna neih zawh taka thlan thar K. Vanlalvena chu MPC Party chuan an lawmpui thu sawiin, ram leh Mipui tana rinawm taka ke pen turin duhsakna an hlan a. Chief Minister, Zoramthanga'n, BJP kaihhruai NDA lam tanga Rajya Sabha rorelna a thu tur an nih thu a puan rual a, "Mizoram tana thalo tur awmah chuan tu party hnuaiah mah kan awm lo,'' a tih erawh awih harsa an tih thu an sawi bawk.

ZMC-ah mi 40 enkawl mek

Mizoram-a COVID-19 kai te enkawlna hmun lian ber, ZMC-ah nimin khan COVID-19 vanga damlo mi 40 enkawl mek an ni a, heng te hi Mipa 11 leh hmeichhia 29, kum 14 atanga 57 inkar an ni a. Aizawl District mi 30, Kolasib District mi 5, Saitual District mi 3, Serchhip District  mi 1 leh Mamit District mi 1 te an ni a. An vai hian harsatna em em nei lovin, Isolation Ward ah enkawl mek an ni.

TB kai 636 hmuchhuak

Kumin January atanga March thla chhung khan Mizoram-ah Ngawr natna, TB vei rinhlelh mi 3469 endik niin heng atang hian TB hrik kai  hmuhchhuah mi 636 an awm a, MDR-TB tia sawi, Drugs resistance TB vei mi 48 hmuhchhuah an ni bawk a, TB kai enkawl dam chu zaa 92.54 an tling thung. TB vei ten thlatin ei tur tha an leina tur, Nikshay Poshan Yojana kaltlanga Rs. 500 an dawn thin chu tun dinhmunah Mizoram-ah mi 4187 ten an dawng mek bawk a ni.