Serchhip-a VLTF te hruipawh leh Movement permit pekchhuah hna thawk zel tura tih an ni

Rampuma inkharkhip tum thumna (lockdown 3.0) kalpui mekah nimin khan Serchhip-ah Addl. DC, HD. Lalpekmawia hovin Serchhip khawpui chhunga Village Level Task Force (VLTF) on COVID-19 kalpui zel dan tur chungchang sawiho niin, VLTF te chuan hrui pawh leh movement permit pekchhuah hna thawk chhunzawm zel se an ti.

Nimin-a Serchhip DC Office-a khawpui chhunga VLTF te thutkhawm hi Addl. DC. HD. Lalpekmawia chuan kaihruaiin May ni 4-17, 2020 chhunga lockdown kalpui tur a nih leh tak avangin sawrkar thuchhuakte zawm a tulzia a sawi a, State sawrkar-in inkaihhruaina dan a siamah VLTF-te chu mawhphurhna sang tak pek an nih thu sawiin, lockdown hmasa-te chu VLTF leh khawtlang hruaitute leh tlawmngai pawl hrang hrangte thawhhona leh inpekna avanga hlawhtling a nih ang bawkin tun tuma lockdown-ah pawh hian tanrual leh tul a tih thu a sawi bawk.

He hunah hian Serchhip khawpui chhunga VLTF 11 (sawm leh pakhat) aiawhte an tel a, COVID-19 laka invenna leh sawrkar thupek leh Dan te zawm tur chuan VLTF duty chhunzawm chu a la tul nia an hriat thu an sawi a, duty-na hmuna hrui pawh leh movement permit pek chungchangah vote lak niin, VLTF 11 kal atanga VLTF 6-in hruipawh chhunzawm an duh avangin hrui pawh hi chhunzawm a ni dawn a, VLTF 8-ten Veng dang-a kal dawna VLTF-te hnen atanga lehkha (movement permit) lak hmasak zel an la duh angin hei pawh hi kalpui chhunzawm a ni dawn a ni.

He hunah hian lockdown 3.0 chungchanga Mizoram sawrkar thupek chhuah leh The Mizoram (Containment and Prevention of Covid-19) Ordinance, 2020 zirhona neih niin, VLTF-te chu heng dan leh thupekte hi uluk taka zirchiang a, zawm turin ngen an ni a. Hei bakah hian VLTF-te chu an huamchhungah mipuite hriat turin dawr hawn leh khar hun, mipuite pawna chhuah chungchang, Social Distancing leh vantlang hmuna hmai tuam, lirthei intlanchhawk leh zan lama curfew chungchangte zau leh zuala puan nise an ti a ni.

The Mizoram (Containment and Prevention of Covid-19) Ordinance, 2020 chuan VLTF Chairman, Vice Chairman leh Secretary-te chu dan bawhchhetute pawisa chawitir theihna thuneihna a pek thu te, he an thuneihna hi thiam tak leh dik taka hmang tura ngen an ni a, pawisa chawitir an awm a nih chuan dik taka record vawng turin VLTF-te chu chah an ni bawk.

He inhmuhkhawmna ah hian Dr. Lal-dawngliana Sailo, Chief Medical Officer, Serchhip leh Victor Zothansanga, SDPO, Ser-chhip-ten thu an sawi bawk a ni.