Serchhip District-ah African Swine Fever (ASF) a luh lohna tura fimkhur turin mipuite chah

Serchhip District AH&Vety Officer, Dr. C. Zarzokima chuan tunlai-a Vawk pul hri leng, African Swine Fever (ASF) in Mizoram a rawn luh lohna tur leh Serchhip District chhunga kan Vawk ten an kai lohna turin lo inven lawk a pawimawh thu a sawi.
Serchhip DVO chuan tunlai hian India hmarchhak State 2- Assam leh Arunachal Pradesh-ah te Vawk pul hri hlauhawm tak, African Swine Fever (ASF) nia rinhlelh a leng mek tih sawiin, Assam-ah ringawt pawh Vawk sang hnih chuang an thi tawh tih a sawi a. He Vawk pul hri hi inkaichhawn awlsam tak a nih avangin a len tawhnaa tih theih awmchhun chu Vawk awm zawng zawng suat mang vek a ni tih a sawi a. Chuvangin he hri hian Mizoram a rawn luh lohna tur leh Serchhip District chhunga kan Vawk ten an kai lohna turin lo inven lawk a pawimawh thu sawiin, hemi atana Serchhip District Bawrhsap in rampawn leh District pawn atanga Vawk leh Vawk atanga thil siam reng reng lakluh lohna tura thupek alo siam tawh chu khauh taka kenkawh a tul thu a sawi a. Chutiang tur chuan khaw tina VC te, NGO te leh Village Level Task Force te pawhin hma an lak a pawimawh thu a sawi bawk.
Serchhip DVO chuan Hri vei nia rinhlelh Vawk damlo leh thi an awm chuan Vety Doctor te leh Field Staff te hnenah report vat thin tur a nih thu pawh sawiin, Vawk damlo reng reng hralh/talh/ei tura sawngbawl loh tur a nih thu te, Vawk In leh vulhna hmunte damdawi hmanga vawn thianghlim tur a nih thu leh midang tlawhpawh tir lovin, Vawk vulhna hmun dang nen inkalpawh loh tur a nih thu te leh Vawk thi reng reng paih mai lovin thuk takah Chinai/Disinfectant te nen phum tur a ni tih a sawi a. Vawk chaw atan chaw nawi khawnkhawm chu natna hrik kai theihna a nih avangin tih loh tur a nih thu leh loh theih loh a nih erawh chuan uluk taka chhuanso thin tur a nih thu a sawi a. Vawk talhna leh puahna ningnawi te felfai taka phum bo tur a nih thu pawh a sawi bawk.
African Swine Fever hi Vawk pul hri niin DNA Virus chi khat, Asfivirus thlen a ni a,  Vawk leh Sanghal chi ten veiin, mihring-ah he natna hi kaichhawn ve theih a ni lova. A hmasa ber turin kum 1921-ah Africa khawmualpuia Kenya-ah hmuhchhuah a ni a, Asia khawmualpui-ah chuan kum 2018 August thla khan China-ah hmuhchhuah a ni. ASF hi natna inkaichhawn awl tak, a vei te chuan an thihpui tlangpui a, a enkawlna tur damdawi leh a venna tur (Vaccine) a awm lova, he natna hi Vawk ten an kai chuan an kai atanga ni 4 atanga ni 19 chhungin a lang chhuak ber a, Vawk pul hri kan tih dang Swine Fever, Erysepelas leh PRRS te nen a lanchhuah dan a inang hle a, Vawk a hrik awm (Ornithodoros species) te hian an pu darh a, Vawk natna vei ten an pu darh bawk a, Vawksa atanga siam Sausage, Meat ball, etc. atang te pawhin a natna hi a darh thei nia sawi a ni bawk.

Comments

Chhiar Hlawhte