Chanchin thar thenkhat :

Ramri-a duty tlawhchhuak

COVID-19 inkharkhipna kalpui mek a Ko-lasib District leh State dangte inrina kal khan hrang hranga Task Force duty te harsatna thlithlai a, an mamawh te ngaihtuah saktu tur Border Safety Monitoring Team te chuan heng hmuna duty te hi an tlawhchhuak a. Border Safety Monitoring Team te hi Team hnih-ah inthenin Team pakhat hian Bairabi South, Bairabi North, Meidum, Pangbalkawn, South Chhimluang, Bukvannei, Buhchangphai leh Phaisen-a duty te an tlawh a. Team hnihna hian Vairengte, Phainuam leh Sai-phai te an tlawh bawk. Border Security Monitoring Team te hian ramri dep a duty te hman tur Face Mask leh Rain Coat te an hlan nghal a ni.

Uar zawkin Buh chin tum
Social Welfare Minister, Dr. K. Beichhua chuan Siaha District COVID-19 Food Security Consultative Committee Chairman a nihna angin nimin khan Siaha District Earth Movers Association hruaitute Meeting a neihpui a. COVID-19 hrileng avanga Tam (famine) thleng thei lakah Siaha District mipuite ei leh bar kawnga an lo inbuatsaih lawk theih nan an District khaw hrang hranga leilet awmte chu buh chin theih nan rua-hman vek an tum a, hemi kawngah hian Earth Movers Association te chu ruahmanna siampui tura he Meeting hi neih niin hmalak dan tur hrang hrang an sawiho a ni.

MZP hruaitute fehchhuak
Chakma Autonomous District Council (CA-DC) Area-a Zohnahthlak ten inkharkhipna avanga Chakma-te enhran an tawh avanga an thlavang hauh tur leh ei leh bara harsatna tawk te a tul anga tanpuina pe turin MZP Vice President, Peter Chhangte leh General Secretary, Lalnunmawia Pautu te chu nimin khan Aizawl atangin an chhuak a. Ram leilung faten kan ram chhung ngeiah hnamdang laka harsatna an tawk thin chu MZP chuan an hrthiam lo hle tih sawiin, Ram leilung fate thlavang hauh tur hian MZP chu a tul angin a che chhuak zel dawn tih an sawi bawk.

Mizoram dinhmun thar ber
Nimin tlai dar 5:00 thleng khan Mizoram ah COVID-19 avangin mi 77,508 endik an ni tawh a, mi 1395 te chu Rapid Anti Body Test of India (RATI) neih ni tawh bawkin mi 195 te Sample chu enfiah tura lak a ni tawh bawk. COVID-19 avang hian mi 7178 te chu In lamah khunghran ni tawhin mi 2111 te chu sawrkar hmun ruat bikah khunghran an ni tawh bawk a, hri kai hmuhchhuah belh an la awmlo bawk a ni.

DC in KVK hmalakna enpui
Hnahthial District Bawrhsap, Vanlalmawia chuan nimin khan KVK Hnahthial Demonstration Farm chu tlawhin an hmalakna hrang hrang a en bakah bawlhhlawh sawngbawl dan turte a sawipui a. KVK Hnahthial-in Changpat hmanga leitha siam (Vermicomposting) an kalpui mekte chu enfiahin Hnahthial khawchhunga bawlhhlawh tawih thei (Wet) te chu mumal taka sawng-bawl a nih theih dan turte an sawiho bawk.

Tangkhang 926 rawn kir
Mizoram sawrkarin India hmarchhak State pali - Assam, Manipur, Meghalaya leh Tripura-a Mizoram mi tangkhangte haw a phalsak hnuah Vairengte kaltlangin mi 926 an rawn haw tawh a. Heng zingah hian Aizawl District mi tam berin mi 420 an ni a; Lawngtlai District mi 165, Siaha District mi 120, Lunglei District mi 108, Kolasib District mi 50, Serchhip District mi 34, Cham-phai District mi 14, Mamit District mi 6, Saitual District mi 5 leh Khawzawl District mi 4 an ni.

Inkaihhruaina ennawn duh
MPC Party chuan Hripui leng avanga Mizo-ram-a Lockdown thawh thumna hman mek-a inkaihhruaina Dan siam chu ennawn leh tura sawrkar an phut thu an sawi. Nimin a thuchhuah an siamah MPC Party chuan Mizoram-a Lock-down thawhthumna mipui nawlpuiin kan hman dan thlirin mipuite kan del dul hle tih sawiin, a ngaihthat thlak loh an tih thu an sawi a. Green Zone kan nihna denchhena kan ngaihthatna chu kan hmang thiam lovang tih a hlauhawm hle tih sawiin, “Mizoram sawrkar pawhin tun aia ruahmanna uluk zawk leh fimkhur zawka hmalakna nei tha leh turin MPC Party chuan Mizoram sawrkar kan phut,” an ti.

Comments

Chhiar Hlawhte