Adviser to CM in Serchhip Mat phai tlawhin Cold Storage thuamthat mek a tlawh bawk

Adviser to Chief Minister, C. Lalramzauva chuan nimin khan Serchhip rawn tlawhin Serchhip Mat Phai, Chawm Kai-a Lei dawh thar chu a tlawh bakah Sailiam-a Cold Storage thuamthat mek a tlawh a. Kumin chho hian Serchhip Mat luidung-ah nasa zawka Tomato ching tura ngaihtuahna sen mek a nih thu a sawi bawk.

Adviser to Chief Minister, C. Lalramzauva hian nimin khan Serchhip Mat phai, Chawm Kai-a PWD ten Bailey Bridge an dawh, meter 180 zet-a thui chu tlawhin hnathawh dan a enfiah a, he Lei hi cheng nuai 300 chuang seng-a dawh niin tunah hian a Lei hi dawh zawh ni tawhin a luhna tur lai hi peihfel la ni lo mah se thla khat chhunga tihfel a nih tur thu Adviser to Chief Minister chuan a sawi a, he Lei hi peihfel a nih chuan Zawlpui phai-a kuthnathawktute tan a tangkai dawn thu leh Zote South tan pawh Serchhip kalna awlsam a nih dawn thu a sawi bawk.

Adviser to Chief Minister chuan thlai chingtu ten Lei bul-a kawng an siam thar tur pawh enin, tunhnaiah COVID-19 avangin Mizoram leh khawvel pumin harsatna nasa tak tawk mah se Serchhip khua in harsatna kan tawh ve tho karah midangte harsatna tawh sukiang tura kuthnathawktute hnathawh rah zar kan zo chu lawmawm a tih thu leh thlai tam tak, vawikhat-a hralh zawh vek senloh hial thawnchhuah a ni tih a sawi a. Heng thlai te tharchhuak tur hian Serchhip Mat phai-a ram tha tak tak chu a hman dan kan thiam chho zel tih sawiin, tuna kan thlen chinah duhthu la sam lo mah se tun aia tangkai zawka hman dan te pawh Horticulture Department leh sawrkar pawhin ala ngaihtuah chho zel dawn nia a lan thu a sawi a. Kumin chho hian Mat luidung remchang laiah Mizoram pum chawm thei tura Tomato chin theih beisei a nih thu pawh sawiin, a chi pawh sawrkar atanga hmuh theih beisei a nih thu leh a thawktu tur ten hetiang zawng hian hma an la thei dawn em tih ngaihtuah mek a nih thu a sawi a. Phai lam atanga lakluh aiin mahni tharchhuah ngei chu a hralhna pawh a that zawk a beisei thu a sawi bawk.

Adviser to Chief Minister hian Ser-chhip Sailiam kawn-a thlai MT 90 zet vawnthatna, Cold Stogare thuamthat mek pawh a tlawh a, he Cold Storage hi hun rei tak hman theih loha awm tawhin Power lakluh a nih chuan hman theih mai tawh tura peih a ni tawh a ni.