Chief Minister's Relief Fund for COVID-19 dinhmun

Mizoram-a COVID-19 dona atana Chief Minister's Relief Fund-a sum chhunluh chu Rs. 7,56,13,790/- ni tawhin Rs. 5,48,97,065/- chu semchhuah a ni tawh.

Sawrkar thuchhuah in a tarlan danin COVID-19 dona leh mi harsate tanpuina turin Chief Minister's Relief Fund-ah sum a lut zel a, nimin tlai thlenga Kohhran, Pawl, Sawrkar hnathawkte leh mimal atanga sum lut tawh zawng zawng chu Rs. 7,56,13,790/- a ni a. Hming tarlan duh lo leh mi thenkhat hnen atangin CM Relief Fund Account-ah 'online'-in a lut nual bawk a. Hei bakah hian nimin khan cheng nuai khat chuang lut a awm leh bawk a ni.

Chief Minister's Relief Fund hi a hmanna tur ngaihtuahtu chu Committee on Utilization of Chief Minister's Relief Fund for COVID-19 Chief Secretary kaihhruaina hnuaiah din niin he Committee ruahmanna angin Chief Minister's Relief Fund sum te hi pekchhuah thin a ni a. Niminpiah tlai thleng khan Rs. 5,48,97,065/-hmanral ni tawhin tunah hian hman bang Rs. 2,07,16,725/- a awm a ni.

Chief Minister's Relief Fund hi Local Task Force/Village Level Task Force/Home leh Rehabilitation Centres-ah Rs. 2,28,50,000/- pekchhuah ni tawhin Basic Services to Urban Poor (BSUP) a chengte tan cheng nuai 6 hman a ni tawh bawk a. State ramri-a Group YMA/YLA/MTP Duty te hnenah leh Home leh Rehabilitation Centres tana pekchhuah hmasak a dawng ve lote tan Rs. 62,08,500/- pekchhuah niin India ram hmun hrang hranga Mizo Welfare/Association leh Zirlai pawl te hnenah a Thawh khatna-ah Rs. 1,58,36,000/- leh a thawh hnihna ah Rs. 75,90,000/- pekchhuah a ni bawk a. Mizoram House Kolkata/New Delhi/Bengaluru/Guwahati/Shillong-a tangkhangte ei man atan Rs. 7,60,565/- pekchhuah niin Mamit, Kolasib leh Champhai Sub-Hqrs. YMA hnenah cheng nuai khat theuh pek a ni bawk a. Chin Refugees, New Delhi hnenah cheng nuai 5 leh Mumbai Mizoram House-a thawktu, damlo leh awmpuite thisen test-na atan Rs. 2,52,000/- pek a ni bawk.

India-a COVID-19 kai 49,391 an tling tawh

Nimin tlai thleng khan India ramah COVID-19 kai hmuhchhuah mi 49,391 an awm tawh a, hri kai atanga za zela 28.71 chu enkawl dam an ni tawh thung. Ministry of Health & Family Welfare in an chhinchhiah danin nimin tlai thleng khan India ramah COVID-19 kai hmuhchhuah mi 49,391 awm tawhin an zinga mi 14,182 te chu enkawl dam an ni tawh a, he natna kai nunna chan mi 1694 awmin rampawn-a thawnchhuah mi 1 a awm tawh bawk a, tunah hian natna kai enkawllai mi 33,514 an awm bawk. He natna kai atanga chhutin za zela 28.71 chu enkawl dam an ni tawh a, za zela 3.24 in nunna an chan thung a ni.