Leilet nei, COVID-19 hripui vanga leilet theilo te chu sawrkar-in lei a leh sak dawn

Agriculture Minister, C. Lalrinsanga chuan Leilet nei, COVID-19 hripui vanga hnamdang an chhawr ten an haw san avanga leilet thei lo te chu sawrkar-in lei a leh sak dawn tih a sawi.
Agriculture Minister hian Kolasib District tlawh mekin leilet neituten COVID-19 avanga hnathawk chhawr tur, leilet a hman tur bawng leh leilehna tur khawl an neihloh avanga harsatna an tawh te sutkian a nih theih nan a thlawna hman tur Bilkhawthlir-a Custom Hiring Centre-ah Tractor a vailiam a, hemi puala inkhawm neih ah Agriculture Minister chuan Custom Hiring Centre kalphung sawiin, Custom Hiring Centre chu leilet a khawl hmang a hnathawk turin, mimal nilovin, pawl hnen a hlan a nih thu a sawi a. Centre enkawltute leh leilet neituten tangkai tak a an hman theihna tur a duan a nih thu sawiin, a nihna tur a hmang lo te chu laklet leh theih a nih thu a sawi bawk a. Leilet nei, hripui vanga hnamdang an chhawrte'n an haw san avanga leilet theilo te sawrkarin lei a leh sak dawn thu sawiin, COVID-19 hian Mizoram hmun hrang hrangah ei leh bar a intodelh duhna a pun tir nasat thu a sawi a, leilet zau tha tak tak neitute pawhin mahni leilet-a hlawkna teltu nih tum a hma la turin a chah bawk.
COVID-19 avangin Kolasib District chhunga leilet neitute zingah harsatna tam tak lo piang chhuak enfiah turin Agriculture Minister, C. Lalrinsanga leh Agriculture Development Board Member te chuan Kolasib, Bilkhawthlir, Bairabi leh Bukpui tlangdung te tun thla ni 13 atang khan an tlawh a. Lockdown avangin Leilehna tur bawng neilo te, khawl nei lo te, leilet enkawltu vai neilo te an lo awm thar teuh a, chu chuan leilet tam tak chu buh chin theih lohin a awm phah mek a. He harsatna chingfel turin helai chhehvel a Custom Hiring Centres awm mekte hmang tangkaiin loneitute ram siam sak turin Minister hian Vawiin khan Tractor 5 a vailiam a. Heng khawl te hian loneitu harsatna nei te ram a lehsak dawn a ni. Kolasib DAO tarlan danin tun dinhmunah hetiang ang harsatna tawk mek hi chhungkaw 123 an awm mek a, ram hactare 151 a zau anga chhut a ni.
Agriculture Minister hian Phaipheng ( Bilkhawthlir) zau a Tractor hnathawh pawh a enpui bawk a. Custom Hiring Centres te chu taima taka hnathawk tur leh loneitute harsatna lo ngai pawimawh zel turin a chah a, a tul angin Centre pek belh zel theih a nih thu a sawi bawk. Hei bakah hian Minister hian Bairabi North leh South VLTF te hnenah Rs. 5000/- ve ve hlanin, Bairabi Zophai leh Mamit District chhunga Saikhawthlir leh Suarhliap tlawh bawkin loneituten harsatna hrang hrang an lo thlen bawk a ni.

Comments

Chhiar Hlawhte