Mizoram-a Lockdown kalpui mek chu a thawh li-na atan chhunzawm tha tih a ni

Chief Minister, Zoramthanga hova nimin-a Minister, Sawrkar Official, Kohhran leh tlawmngai pawl bakah Political party aiawh thukhawm chuan lockdown thawh thumna a zawh hnuah pawh lockdown neih chhunzawm zel tha an ti a. Lockdown neih chhung tur leh a kalphung tur chu Chief Secretary kaihhruai State Executive Committee-in a la duang dawn a ni.

Mizoram-a Inkharkhip pawhsei chungchang hi nimin khan Aizawl Treasury Square-a Assembly Annexe Conference Hall-ah ngaihtuah a ni a, he hunah hian Chief Minister Zoramthanga chuan Lockdown chhunzawm chu tuna kan dinhmunah a la tul hle nia a hriat thu sawiin, Green Zone ni mah ila min hual veltu state leh ram te an la him loh avangin inthlahdul thei kan la nih loh mai piah lamah kan fimkhur zual sauh a tul thu a sawi a. Mi tam tak tan an eizawnna a thuanawp phah avangin Economic activities thenkhat chhunzawm thei tura kan inkharkhipna hi thlahdul ngai mah se heng zawng zawngah hian a pawimawh ber chu he natna hrik leng mek hi kai an awm loh a, an inkaidarh loh a ni a ti bawk.

He huna tel pawl hrang hrang aiawhte chuan tuna India dinhmun thlirin inkharkhip hi chhunzawm zel nise tha an tih thu an sawi hlawm a. Tun dinhmunah Mizoram chu hri leng lakah fihlim angin lang rih mah se, engtik hunah pawh hri hi lo lut thei reng a nih avangin inkhuahkhirhna hnuai awm chu mipui himna tur nia a lan thu an sawi bawk. Heng bakah hian Ramri a duty chungchangah te, Quarantine Centre siam belh leh Home Quarantine chungchanga ngaihdan te, lirthei tlan dan leh State pawn atanga bungrua lo lut thei leh theilo thliar chungchang te, Rapid Antibody Test chungchang leh adangte sawiho a ni a. Kalkhawmte hian state pawn atanga tangkhang lo haw tur te chu an theihtawp a an fimkhur a pawimawh thu te pawh an sawi bawk.

Ramchhunga COVID-19 leng mek avang hian March ni 22-a Sawrkar laipuiin ni khat chhung Curfew a puan tuk atang khan Mizoram chu vawiin thlengin inkharkhipna hnuaiah a la awm chhunzawm zel a. Sawrkar laipui duh danin, inkharkhip hi tum 3 pawhsei tawh a ni a, tuna inkharkhip kalpui mek hi naktip, Pathianni hian a tawp tawh dawn a, Prime Minister Narendra Modi chuan Lockdown kalpui mek hi pawhsei a nih tur thu alo sawilang tawh bawk a ni.