Chief Minister hovin Vegetables and Fruits Supply Chain chungchanga hmalak dan sawiho

Nimin khan Chief Minister, Zoramthanga hovin Vegetables and Fruits Supply Chain chungchanga hmalakna te thlirhona neih a ni.

Chief Minister Office Cabinet Meeting Room-a he sawihona hunah hian Chief Minister, Zoramthanga chuan COVID-19 hrileng kara ei tura harsatna mipuiin an tawh theihna tur sukiang tura Vegetables and Fruits Supply Chain tluang taka kalpui a ni chu lawmawm a tih thu a sawi a. Mizoram chu chaw leh ei tur dang dangah a intodelh a pawimawh thu sawiin, he hripui hian khawi ram economy pawh a tibuai vek a; ngai awh tura hma kan lakna turah Mizoram chu Primary Economy, Agriculture a innghat kan nih angin leh hemi kawnga SEDP hnuaia bul kan lo tan tawhna leh hmalak zelna tur nen intundinna kawngah pawh hma tha tak kan la thei dawn a ni, a ti a. Chief Minister chuan kuthnatawktute thuamthat a pawimawh thu sawiin, an tana harsatna lian tak chu tui mamawhna a nih thu leh, Fur ruahtui khawl tura ruahmanna tha neih a pawimawh thu a sawi a. “Kan ram hi intodelh turin kan kal chho zel ang,” a ti bawk.

He hunah hian Sairang leh Khawzawl-a Cold Storage enchhinna chu a hlawhtlin thu tarlan niin Serchhip-a Cold Storage sak zawh tawh pawh tih nun thuai tura rel nghal a ni a. Mizoram pangpar demand san ber hun lai pakhat - Good Friday leh Easter Sunday chu Lockdown hunchhungah a tlak avangin pangpar hralh theih tak loh avanga hloh zat chu cheng vbc. 2 bawr vel a nih thu tarlan a ni a. Heng bakah hian hmun hrang hranga hmalakna te pawh he hunah hian tarlan a ni bawk.

He Meeting hian Supply Chain chu lockdown kalpui a nih chhungin leh a tul dan ang zela chhunzawm turin a rel a. Thlai chi mamawhna a sang chho hlein, tum hnih thlai chi chah thlen tawh a ni a, hei hi a vaiin cheng nuai 87 chuang man ni tawhin tunah hian consignment thum chah mek niin, a tul dan ang zela chah belh pawh an rel nghal bawk.

COVID-19 hripui leng avanga inkharkhipna kalpui chhunga State chhunga kuthnathawktuten an thei leh thlai thar hralhna tur ruahman sakna turin leh khawpui a chengten ei tur mamawh awlsam zawka an hmuh theihna tura Chief Minister ruahman, Vegetables and Fruits Supply chain hnuaiah hian March ni 28, 2020 khan a hmasa ber atan Aizawl ah thlaithar lakluh a ni a. April 30, 2010 tlai dar 4:00 thleng khan trip 164 chu Aizawl-ah thleng tawh in, Veng 78-ah heng thei leh thlai te hi sem a ni tawh a. Home leh Rehabilitation Centre-ah leh Veng pathum ah trip 12 chu a thlawn a sem a lo ni tawh bawk. Heng thei leh thlai zawng zawng leina man hi Rs. 103,22,161/- niin, hralhchhuahna chu a vaiin Rs. 97,04,437/- a ni bawk.