Kolkata-a Mizo Cancer enkawllai 2 in COVID-19 vei

/
Kolkata AMRI Hospital-a Cancer avanga enkawl mek Mizo zingah COVID-19 positive hmuhchhuah thar an ni.
He thu hi Health Minister, Dr. R. Lalthangliana chuan nimin khan sawiin nimin chawhma lam khan AMRI Hospital, Kolkata-a Cancer natna avanga inenkawl mek pakhatin vanduaithlak takin COVID-19 natna a kai tih hmuhchhuah a ni tih a sawi a, chanchin hriat a nih veleh Kolkata Mizoram House Joint Residence Commissioner nen inbe nghalin hmalak dan tur ngaihtuah a ni a, hetia ngaihtuahna an sen mek lai nimin chawhnu lam khan AMRI Hospital-ah vek hian Cancer avanga enkawl mek Mizo pakhat dangin COVID-19 a kai tih hmuhchhuah a nih thu an hriat leh thu a sawi a, heng mite hi mipa ve ve an nih thu a sawi bawk.
Health Minister chuan mipuite leh Kolkata lama awm Mizote chu chi-ai lo tura ngenin, sawrkarin theihtawp chhuahin a tul ang angin hma a la nghal tih a sawi a, amah ngeiin West Bengal sawrkar-a Health & Family Welfare Department Principal Secretary pawh phone hmangin thil awmzia a hrilh hriat thu a sawi a. Principal Secretary pawhin tha taka a lo chhan thu leh theihtawp chhuaha lo buaipui an tum thu Health Minister hi a lo hrilh tih a sawi a. West Bengal sawrkara Health & Family Welfare Minister, an Chief Minister ni bawk, Mamata Banerjee hnena lehkhathawn tur pawh buaipui mek a nih thu leh a rang thei ang bera thawn tum a nih thu Healh Minister hian a sawi a. COVID-19 natna veite hming leh nihna tilang thei thil Social Media leh thildangah thehdarhlo tura mipuite ngenin, anni bakah an chhungte tana hriat nuamlo leh rilru tina thei tawngkam chhak chhuak lo turin mipuite a ngen bawk.
Health Minister Dr. R. Lalthangliana chuan Zoram Medical College (ZMC) a COVID-19 natna vei enkawl mek chu test hmasa a Negative hnuah hma a sawn zel tih sawiin, nimin chhun khan ICU atangin Isolation Ward-ah sawnchhuah a nih thu leh ngaihtuahawm a nih loh thu a sawi a. Mumbai Mizoram House-a COVID-19 positive hmuhchhuah pariat (8) zinga panga (5) chu negative tawhin damdawi In an chhuahsan tawh thu pawh sawiin, Quarantine Facilities-ah an awm mek a ni, a ti a, midang pathum pawh an dinhmun a tha a, an test result pawh hriat theih thuai beisei a nih thu a sawi bawk.

Comments

Post a Comment

Popular News (Last 30 Days)

A hun pangngai ah Pavalai Intawhkhawmna neih tum a ni

/
Image
April 12-14, 2024 chhunga Mizoram pum huap Kohhran Pavalai Pawl Intawhkhawmna neihna tur East Lungdar tlang-a Pandal sak chu tukin zing-a thli tleh khan a tichhe vek a. Vawiin vek-a Organising Committee thutkhawm hmanhmawh neih chuan a hun pangngai a neih tumin Pathian chakna ringin inbuatsaihna kalpui nise an ti a. Naktuk (April 1, 2024) atangin Pandal chhia senghawi hna leh Pandal sak that hna chu a khawnat-a thawh nghal tum a nih thu East Lungdar Village Council President K. Lalngaizuala chuan LENKAWL a hrilh.
Kimchang zawkin »

LPG man bithliah thar a ni

/
Image
IOCL in Revised Retail Selling Price a tihchhuah angin Mizoram chhunga eirawngbawlna gas man chu bithliah thar leh a ni a, Vairengte tih loh Mizoram hmundang zawngah chuan LPG Domestic Cylinder kg. 14.2 a rit man chu bur khat Rs. 955/- niin kg. 19-a rit Commercial Cylinder chu Rs. 2224.50 leh kg. 19-a rit XtraTeJ chu Rs. 2247/- a ni anga, kg. 10 a rit Composit Cylinder chu Rs. 688.50 a ni bawk ang. Gas man hi Home Delivery kalpuina ah chuan bur khat ah Rs. 70/- aia tam lo belh tur a ni anga, Home Delivery kalpui thei nganglo Veng, Point delivery kalpuinaah chuan Rs. 7.53 zel belh tur a ni a. Godown-a hralh erawh chuan Rs.33.43 zel paih thung tur a ni.
Kimchang zawkin »