CM Relief Fund-ah nuai 724 lut; nuai 548 hmang tawh

COVID-19 dona leh mi harsate tanpuina turin Chief Minister’s Relief Fund-ah cheng nuai 724 chuang lut tawhin cheng nuai 548 chuang semchhuah a ni tawh bawk.

Nimin a sawrkar thuchhuah in a tarlan danin COVID-19 dona leh mi harsate tanpuina turin Chief Minister’s Relief Fund-ah sum a lut zel a, April ni 30, 2020 thlenga Kohhran, Pawl, Sawrkar hnathawkte leh mimal atanga sum lut tawh zawng zawng chu Rs. 7,24,63,149/- a ni a. Hei bakah hian hming tarlan duhlo mi thenkhat hnen atangin CM Relief Fund Account-ah online in a lut nual bawk.

Chief Minister’s Relief Fund hi a hmanna tur ngaihtuahtu tur, Committee on Utilization of Chief Minister’s Relief Fund for COVID-19 chu Chief Secretary kaihhruaina hnuaiah din a ni a, he Committee ruahmanna angin Chief Minis-ter’s Relief Fund sum te hi pekchhuah thin niin April ni 30, 2020 thleng khan Rs. 5,48,97,065/- pekchhuah a ni tawh bawk a. Local Task Force/Village Level Task Force/Home/ Rehabilitation Centres-ah Rs. 2,28,50,000/- pek niin Basic Services to Urban Poor (BSUP)-ah cheng nuai 6; State ramri-a Group YMA/YLA/MTP duty te tan Rs. 62,08,500/-, India ram hmun hrang hranga Mizo Welfare/Association/Zirlai pawl te tan a thawhkhatna ah Rs. 1,58,36,000/- leh a thawh hnihna ah Rs. 75,90,000/- te pek an ni.

Heng bakah hian Mizoram House Kolkata/New Delhi/Bengaluru/Guwa-hati/Shillong-a tangkhangte ei man-ah Rs. 7,60,565/-; Sub-Hqrs. YMA Mamit, Kola-sib leh Champhai-ah cheng nuai 3; Chin Refugees, New Delhi-ah cheng nuai 5 leh Mumbai Mizoram House-a thawktu, damlo leh awmpui te thisen test-na atan Rs. 2,52,000/- te pekchhuah a ni a, tunah hian hman bang Rs. 1,75,66,084/- a awm mek bawk a ni.