Chanchin thar thenkhat :

Transport Minister in tlawh

Champhai South bialtu MLA leh Transport Minister, TJ. Lalnuntluanga chuan nimin khan Indo-Myanmar ramri khua a VLTF te leh Tiau kam a duty post te a hmunah kalchilhin a tlawhkual a, Minister chuan tunlai-a hri leng avangin khaw-vel ram ropui leh thil ti thei zawk pawh an buai em em tih sawiin, hmun dangte awh em em Local/Village Level Task Force te hmalakna hnuaiah kan la him zel a ni, a ti. Champhai District Myan-mar ramri dep-ah hian Police duty post 31-ah Police 90 leh YMA Duty post 77 vel a awm mek a, April 27, 2020 atang khan Sub-Hqrs. YMA Champhai hmalakna in SYMA Anti Covid-19 Squad, member 196 awmna an Duty bawk a ni.

LESDE Minister-ah hlan
Federation Of Mizoram Trade Union (FOM-TU) General Hqrs. hruaitute chuan nimin khan Labour, Employment Skill Development & Entrepreneurship (LESDE) Minister leh MBO-CWWB Chairman ni bawk, Lalchhandama Ralte chu a Pisa-ah hmuin Chief Minister Relief Fund atan Rs 10,000/- an hlan a. A hmalakna avanga mirethei zawkte leh Workers Welfare Board a inziaklut, COVID-19 hri leng vanga hnathawk theilo te hnena April 2020 Ration buhfai a thlawna sem a ni leh Welfare Board Member te hnen a Rs. 3000/- theuh pek an ni te chu lawmawm an tih thu an sawi bawk.

In chhia sak that hna thawk
April 4, 2020-a thlipui leh ruah thawkin Sai-rang Dinthar-a chenna In a tihchhiat te In sak that hnatlang chu niminpiah khan Sairang Dinthar Village Level Task Force kaihhruaina hnuaiah neih niin hemi Ni vek hian sak zawh nghal a ni a, vanduaina tawktute chenna In tur hi Assam Type, a chung Rangva leh a bang Tile hmanga sak niin heng In sakna atan hian Aizawl West-I Bialtu MLA, Zothantluanga chuan In chung tur Rangva bundle 4 ve ve a pe a, Sairang Dinthar Branch YMA hnuaia Section YMA ten In sak hna hi an thawk thung a ni.

MSU in ramri-a Duty te hlan
Mizo Students' Union (MSU) General Hqrs. chuan COVID-19 avanga Tuipuiral Group YMA huamchhung ramri a duty te tan nimin khan Buhfai leh chawhmeh chi hrang hrang chu Tuipuiral Group YMA hnenah an hlan a, Tuipuiral Group YMA President, H. Lalniliana chuan hetianga tanpuina an hlan chu lawmawm a tih thu leh Duty te-ah pawh phurna nasa tak a pek thin thu a sawi a. Tuipuiral Group YMA huamchhungah hian duty post hi 27 an siam a ni. Nimin vek khan MSU General Hqrs. hian Sailulak khua-a ramri-a duty te hnenah pawh buhfai leh chawhmeh an hlan bawk.

MAMSOL in Sawhthing lei
Mizoram Agriculture Marketing Solution (MAMSOL) chuan tunlai hian Mizoram chhunga khaw thenkhat- Tinghmun, Sakawrdai, Sialhawk, Khanpui, Chawngtlai, Khawzawl, Lungtan leh North Khawbung-ah te Sawhthing kg. khat Rs. 30/- in an lei sak mek a. Hetianga MAMSOL in Sawhthing an lei hi ZPM chuan lawmawm an tih thu sawiin, tunah MAMSOL-in thingtlang kuthna-thawktute Sawhthing thar, hlep neia hralh leh tura Kg. ah Rs. 30/- a an lei theih chuan, Sawrkar in kut-hnathawktute hamthatna tura hlep nei lova hralh leh tura Sawhthing Kg. 1 Rs. 50/- a lei hi a theih a ni tih a tilang chiang hle niin an sawi bawk.

CM Relief Fund chhunglut
AH & Vety Department a thawktu Officer te leh Staff te chuan COVID-19 avanga harsatna tawkte leh puih ngaite puihna atan an ni khat hlawh chu thawhkhawmin nimin khan Chief Mi-nister's Relief Fund-ah Rs. 13,89,866/- chu an chhunglut a, State Election Commission pawhin Rs. 50,000/-; Mizoram Scholarship Board in Rs. 40,000/- chhunglutin tunhnaia Chennai-a Mizo boral ruang rawn zui hawtu, Raphael AVL Mal-chhanhima chuan Rs. 5000/- a chhunglut bawk. Heti hian COVID-19 avanga puih ngaite puihna tura CM Relief Fund-a sum lut tawh zawng zawng hi cheng vbc. 7 chuang ni tawhin cheng vbc. 5 chuang hmanral a ni tawh bawk.

Comments

Chhiar Hlawhte