A tul chuan hlawh cut bakah MLA Fund pawh sawkar-ah kan pe mai turah kan ngai - Zodintluanga

Congress Legislature Party (CLP) Leader, Zodintluanga chuan State sawrkarin COVID-19 avanga harsatna a tawk tak tak a nih chuan Chief Minister, Minister leh MLA-te an che hmasa tur tih sawiin, “A tul a nih chuan kan hlawh cut mai bakah MLA Fund thleng pawhin sawrkar-ah kan pe mai turah kan ngai,” a ti.

Congress Legislature Party (CLP) Leader, Zodintluanga hian nimin khan he thu hi sawiin Mizoram sawrkar hnathawk, Group A, B leh C ten an hlawh (basic pay) atanga 10% leh Group D-ten an hlawh (basic pay) atanga 5%, thla 8 chhung zet sawrkar sum bawma thawh an tum chungchangah an inhuamna chu ropui a tih thu a sawi a. Mizoram sawrkar hian Financial Year hmasa, 2019-2020 budget atang khan SEDP-ah ringawt pawh cheng nuai 18837.28 zet hman loh (unspend) a la nei tih sawiin, hei hi lapse thei a nih loh avangin hman theih a la nih thu leh Central sawrkar leh NEC atangin vaibelchhe engemaw zat a dawng reng bawk tih a sawi a. COVID-19 do nana Mizoram budget kan hmang ni a sawrkarin a sawi pawh hi 2020-2021 budget pumpui vbc.10,715 atang chuan tlemte a la ni tih sawiin, “Mizoram sawrkar hian a duh phawt chuan project thenkhat atana pawisa a dah tawhte pawh COVID-19 do nan hian a hmang thei a, sawrkar hnathawk hlawh tibuai rihlo hian Mizoram sawrkar sum bawmpui atang hian ruahmanna a la siam thei a ni tih hi Congress Legislature Party ngaihdan a ni,” a ti bawk.
CLP Leader chuan Chief Minister in awihawm loh khawpa sum tam tham tak Mizoram sawrkar hnena a lo luh tur thu te, a thente phei chu rinloh lam atanga sawichhuah ngam loh khawpa tam a lo luh tur thute a sawi tawh tih pawh sawiin, Chanchinbu mite hmaah ngei pawh COVID-19 dona atan pawisa limit a awm loh tur thu a lo sawi tawh bawk tih a sawi a. Hetiang a nih laia sawrkar hnathawk zawng zawng, Group D bakah COVID-19 dona kawnga frontline a awm Health Department leh Home Department a thawk zawng zawngte huama sawrkar tanpuina tur chhunluh a ngai ta chu pawi an ti hle tih a sawi a. “Mizoram sawrkar hi sum leh paiah a harsa tak tak a nih chuan Chief Minister, Finance Minister ni bawk hian a sawichhuak mai tur a ni a. State sawrkar in COVID-19 avanga harsatna a tawk tak tak a nih chuan Chief Minister, Minister leh MLA-te kan che hmasa tur a ni a, a tul a nih chuan kan hlawh cut mai bakah MLA Fund thleng pawhin sawrkar-ah kan pe mai turah kan ngai. Chutiang tur chuan Congress Legislature Party member-te chu kan inhuam reng a ni,” a ti bawk.

Comments

Chhiar Hlawhte