Serchhip District-ah mi 133 khunghran la awmin Sample pakhat thawn tawh COVID-19 lakah a him

Coronavirus leng mek avangin Serchhip District-ah In lama khunghran mi 133 leh Quarantine Facility-a awm mi 6 an la awm mek a, Serchhip atanga Sample thawn pakhat chu COVID-19 lakah a fihlim tih finfiah a ni.
Serchhip a Health Department Office-a thawk atanga thu kan dawn danin sawrkar in ruahmanna a siam angin Serchhip District chhungah hian State pawn atanga rawn haw leh rampawn atanga rawn haw te hi ni 14 chhung tal inkhunghrang tura tih an ni a, hemi ang hian mi 371 te chu Home quarantine niin an zinga mi 238 te chuan khung hran an nih hun hi hmang zo tawhin chhuah tir an ni tawh a, tunah hian mi 133 te chu Home quarantine mek niin tun thlengin Coronavirus kaihhnawih a ngaih theih natna nei an la awmlo a ni.
Hetihlai hian Serchhip District chhung khaw hrang hranga sawrkar in Quarantine Facility a siam ah mi 56 dah ni tawh bawkin heng zinga mi 50 te chuan quarantine hun tur hmang zoin chhuah tir an ni tawh bawk a, tunah hian mi 6 te la awm mekin heng mite pawh hian tun thlengin Coronavirus kaihhnawih a ngaih theih tur natna an la nei lo a, heng mite hi Tourist Lodge, Serchhip-ah mi 3, M/S Khawlailung ah mi 2 leh AYUSH Hospital, Thenzawl-ah mi 1 te an ni a. Heng bakah hian sawrkar in Isolation Ward-a siam-a dahluh mi 3 te pawh chhuah tir vek an ni tawh a ni.
Serchhip District-ah hian COVID-19 vei nia rinhlelh mi pakhat chu a Sample la-a enfiah a ni a, he natna hrik hi a kai lo tih finfiah a nih thu thuneitute chuan sawiin, midang te pawh ngaihtuahawm an ni lo tih an sawi bawk.

Comments

Chhiar Hlawhte