Serchhip District Level Task Force on COVID-19 in hmalakna thlirin hmalak zel dan tur an rel

Serchhip District Level Task Force on COVID-19 chu nimin khan an Chairman leh Serchhip DC, H. Dolianbuaia hova thukhawmin COVID-19 laka invenna kawnga hmalakna hrang hrang te ngiahthlak niin, Lockdown kalpui mek chunga mipuite tana remchanna siam tura rawtna leh dilna hrang hrangte an ngaihtuah nghal bawk.

Serchhip DC Meeting Hall-a Serchhip District Level Task Force on COVID-19 thukhawm hian Serchhip Joint VC leh mimal thenkhat hnen atanga a bik thil avanga hnathawh phalsak (hna kal laklawh thawh chhunzawm) an dilna hrang hrangte chu sawihoin, heng dilna te hi an thawh loh avanga chhiatna nasa zawk (calamity) thlen thei thil a nih chuan, Local Task Force hriatpuina nen District Disaster Management Authority-ah dilna thlen nise an ti a, DDMA in Magistrate te hmanga a enfiah saka, a huna an thawh chhunzawm loh vanga chhiatna nasa zawk thlen thei chi hna a nih ngei bawk chuan hnathawh hi phal sak nise tiin an thawh chhunzawm dan tur leh thawktu tur zat pawh a tul anga bithliah sak theih a ni ang.

Hei bakah hian Lo leh huan-a feh turte zing dar 8:00 hmaa chhuak tura lo tih tawh chu Joint VC lten anmahni area theuh an zirchian hnuah zing dar 9:00-ah zawk sawn hlat an dilna chu rem an tih sak a, Veng hrang hranga Dawrte (Petty Shop) neitute dawr bungrua te an awmna Local Task Force ten an Bazar sak tura rel leh kalpui mek chu Joint VC vek hian a dawr neitute ngei zawk Bazar tura rawtna an thlen angin pawm sak a ni bawk.

He thutkhawm ah hian District Supply Chain Management Committee Member Secretary, Vanlalhmachhuana, EO hnen atangin report ngaihthlak a nih bakah Horticulture leh Agriculture Department atangin an hmalak dan ngaih-thlak a ni bawk a. Zawlpui leh a chhehvel atanga thlai thar te, E. Lungdar Block atanga thar Sawh-thing leh Kurtai te, Khumtung atanga thar Balhla leh Zawngtah te chu a theih anga hralhna zawn pui mek zel an ni tih tarlan a ni.

Mipui nitin mamawh chhekkhawl dinhmun pawh zirchian niin tun dinhmun ah hlauhthawn tur a awmlo nia ngaih a ni. Petrol leh Gas te pawh thil a kaltluan chuan harsa lo tura ngaih a ni a, Petrol leh Diesel hi control niin Essential Services leh District Administration lam te chu permit lova pek zel theih tura ruahmanna siam a ni.

Hei bakah hian District Task Force on Transport atangin an hmalakna ngaihthlak niin Essential Commodity phurtute tana District chhunga Hotel leh Workshop inhawng tura tihte an tlem deuh nia hriat a nih avangin, dawr tam zawkte an inhawn theih nan hmalak niin nimin vek khan ruahmanna thar siam nghal a ni a, heng dawr inhawng tura tihte hi a mamawhtuten awlsam taka an hriat theih nan hmun langsar laiah felfai taka signboard nei theuh tura hmalak tum a ni.

Serchhip DVO, Dr. C. Zarzokima chuan Serchhip District-a ran chaw chhekkhawl dinhmun leh kan nitin mamawh dan te tarlangin, ran chaw Stock leh lokal mek te chu daihzai taka ranvulhtute hnena sem a nih theih nan AH & Vety Department chuan mawh lo lain, a tul angin a hralhchhuahna lam lo enpui se an ti bawk.

He hunah hian Serchhip Addl. SP, PC. Laltanpuia chuan tunah hian District chhung hmun 28 ah Police 139 te an duty mek tih sawi bawkin, tun thlengin harsatna lian tham engmah kan la tawk lo nia hriat a nih thu a sawi a. Supreme Court thupek anga Jail tang thenkhat chhuah tir hna pawh kalpui niin Serchhip District Jail atangin mi 23 chhuah ni tawhin midang 20 chhuah tir leh tura hriattirna dawn leh a ni bawk a. Ser-chhip-a Asst. Commissioner of Excise & Narcotics, B. Ngurchhuana chuan Lock down laia an hnathawh dan leh an thil man te tarlangin, an mamawh hmanrua te a theih anga ngaihtuah zel tura ruahmanna siam a ni bawk.

He Meeting-ah hian Serchhip District Level Task Force on COVID-19 Member te an tel tha hle a ni.