Latest News

School luh tan hun tur sawilawk theih ala ni lo

School Education Minister, Lalchhandama Ralte chuan School luh tan hun tur chu sawilawk mai theih ala nih loh thu a sawi.
Mizoram mipuite hnena nimin a thuchah a sawiah Education Minister, Lalchhandama Ralte chuan nimin, April 1, 2020 kha kum 2020 leh 2021 Academic Session tan ni, School Calendar kan hman tan hun tura sawrkarin a ruahman a ni tih sawiin, amaherawh chu COVID-19 avangin khawvel, India sawrkar leh Mizoram sawrkar kan buai tak thu leh hetiang rum rum kan nih tak avang hian School hi tan theih a nih takloh thu a sawi a. “COVID-19 harsatna kan tawh tan tirhah School Education thuneitute kan thukhawm a, kan Chief Minister berawn in engtik hunah nge School Session hi kan tan theih dawn tihte kan thlir a. Amaherawhchu he hri hian engtik ah nge min kian san dawn tih a sawi mai theihloh avangin Zoram mipuite sikul kan luh tan hun tur hi kan sawi lawk mai theilo a ni tih min hriatpui kan duh,” a ti a. Naupang te an chawlh lai, awllen lai a ni nachungin zirlaibu zir tur nei chiahlo mah se, he hunawl remchang ah hian lehkhabu tangkai an chhiarna tur atan hun tha an nei ah ngaiin, chutiang atana hmang tangkai turin a chah bawk a ni.
Education Minister chuan State thenkhat ten Online in Class te an kaltir tih mi thenkhat ten an sawi chungchang pawh sawiin, heng te hi Academic Session kal lai la zo lo, Final Semester an beih laite a nih thu leh an tih awm tak a nih thu a sawi a. Keini hi chu School vacation kan neih lai, kan chawlh lai a nih thu sawiin, Class/pawl sawn thar turte Admission pawh la ti lo, zirlai pawh la zir tanlo kan nih avangin helaiah hian kan naute hnenah online class kan lo pe lo anih pawhin kan Session inan loh vang te a nih thu leh hetiang hun hi thleng pawh nise Internet Facility rampum a kan neih dante en in, heng hi chu kan hmachhawn ve thei chiahlo mai thei tih a sawi bawk.
Kumin a pawl 12 Exam mek te chungchang pawh sawiin Education Minister chuan, ni 3 chhung vel exam la nei turte an nih thu leh March 23-a Lockdown avanga Exam chhunzawm theih a nih takloh thu a sawi a, “Heng kan exam lai han sukuk ta, zawh ve chak tak, tuna rilru thaw ipik taka awm mekte sawrkarin a khawngaih em em a, amaherawh chu he Covid-19 boruakte a zawh fel hunah a reilo thei ang berin exam hi conduct chhunzawm leh kan tum dawn,” a ti a. Tuna chawlh an hman chhung hian rilru inthlahdah lova, zirna hun tha an nei a ni tih hriaa an zirlaite taima taka hmabak an neihte lo zir chhunzawm tura an beisei thu a sawi a. Pawl 12 Exam mekah hian Candidate 12,609 an awm thu leh hmun thum-a then-a hmun hnih vel chuan Exam an zawh tawh thu leh exam hmabak la nei hi mi sangli leh tlem an nih thu a sawi bawk.

Comments

Popular News (Last 30 Days)