COVID-19 Lockdown avanga thingtlang loneitute tana harsatna awm thei sutkian dan tur sawiho a ni

Agriculture Minister, C. Lalrinsanga leh Agriculture Department-a Commissioner leh Director te chuan nimin khan District hrang hranga Deputy Commissioner leh District Agriculture Officer-te Video Conference hmanga Meeting neihpuiin COVID-19 Lockdown avanga thingtlang loneitute tana harsatna awm thei sutkian dan tur a sawipui.

He sawihona hunah hian Agriculture Minister chuan COVID-19 in khawvel hmun hrang hranga harsatna nasa tak a thlen mekah India ram state hrang hrang zingah Mizoram ngei pawh a tuartu anih thu sawiin, mipui harsatna leh loneitute leh kut hnathawktute harsatna tawh chu a theih anga sutkian anih theih nan Sawrkar in in hma a la mek a ni, a ti. Agriculture Minister chuan April ni 14 thleng inkharkhipna kalpui mekah kuthnathawktute chu chi-ai lo tura a duh thu sawiin, invenna uluk tak chunga ram lam hna thawh chu tul a tih thu leh ram lam boruak chu hmun him zawk a nihna chin a awm thu a sawi a. Kalkhawm dul dul zawng ni lova mangkhawh, thlai chi thlak leh Thlam sak leh tul dang dang te inkhap lova hma la turin kuthnathawktute a chah a. District leh Local Level Task Force te, Law Enforcement lama thawktute, Health Care provider-te leh khawtlang hruaitute bakah Kohhran hrang hrangte chu an hmalakna leh an inpekna ah fakawm a tih thu sawiin, Kut hnathawktu ten tluang taka an hna an chhunzawm theih nan fimkhur tak chunga ruahmanna te siam turin District hrang hrang thuneitute chu a chah bawk.

Agriculture Minister chuan tunhnaiah COVID-19 denchhenin PM KISAN Scheme hnuaiah Mizoram loneitu mi 43,208-te bank account ah cheng nuai 864.16 thun hman a nih thu a sawi a, kawng tinrengah Sawrkar chuan he hripui laka invenna leh a dona kawngah theih-tawpin hma a la zel dawn a ni tih a sawi a. SEDP hnuaia Maize Cultivation chungchang pawh sawiin Agriculture Minister chuan, SEDP hmanga District hrang hranga Monocrop Vaimim chin tur, a chi an chah te chu tunlai-a COVID-19 lockdown avanga lirthei kal dan a chatlak tak avangin a theih ang anga Vaimin chi phurtu lirtheite tanna State leh District thuneitute be pawp a, Essential Commodity a nih anga hma lo la tura ruahmanna siam a nih mek thu he hunah hian a sawi bawk.

Chief Minister, Zoramthanga kaihhruaina in COVID-19 Lockdown chhunga mipui ten thlai leh chawhmeh chi hrang hrang ei tur phang lova an neih theih nana hma lak a nih thu pawh sawiin Agriculture Minister, C. Lalrinsanga chuan, tuna veng tin-a ruahmanna kalpui mek a ni chu lawmawm a tih thu leh thlamuanthlak a tih thu a sawi a. Zoram mipuiten State dang-te entawntlak khawpa Sawrkar thu an ngaichang thiam leh Sawrkar thupekte kan zawm that avanga lawmthu sawiin, chutih rualin he hripui laka beihpui thlakna kal zelah hian mipui ten tha thlah lova Sawrkar hmalakna te thlawp chhunzawm zel turin a chah a. Sawrkar thuneitute, Task Force lama duty te, Damdawi lama thawkte leh Dan leh Thupek kengkawhtute thu awih chhunzawm zel turin mipuite chu a chah a ni.

He sawihona hunah hian District hrang hranga Deputy Commissioner te chuan loneitu ten an Lo leh thlawhhma-a an feh theih nana ruahmanna an siam dan leh an kalpui dan te an sawi a, ramri dep Mamit leh Champhai District-a khaw tlemte ah erawh fimkhur thu hlaa feh khap a nih chhan te an sawifiah bawk.

Hei bakah hian Kurtai hertute, Sawhthing chingtute leh Oil Palm chingtute harsatna tawh mek te pawh DC te hian sawiin, Kurtai hi MIZOFED in lei dan lo ngaihtuahin, Sawhthing hi MAMSOL in a lakkhawm dan ngaihtuah se an ti a. Sawthing hralh tawh, a phurhchhuahna lamah harsatna tawk mekte tan Plying Permit pek dan zawn nise an tih bakah Oil Palm chingtute tan an tharchhuah an hralh thei nan kawng zawn nise tiin an rel bawk a ni.